اردو ورلڈ کینیڈا ( ویب نیوز ) امریکی صدر ڈونلڈ ٹرمپ برطانیہ کے دو روزہ سرکاری دورے کے بعد وطن واپس پہنچ گئے۔
اپنے خصوصی طیارے میں میڈیا سے بات کرتے ہوئے انہوں نے لندن کے میئر صادق خان پر کڑی تنقید کی۔ٹرمپ نے کہا کہ انہوں نے درخواست کی تھی کہ صادق خان کو گزشتہ رات برطانیہ میں ہونے والی سرکاری ضیافت میں مدعو نہ کیا جائے کیونکہ وہ انہیں کافی عرصے سے ناپسند کرتے تھے اور نہیں چاہتے تھے کہ وہ آئیں۔
ڈونلڈ ٹرمپ نے دعویٰ کیا کہ لندن کے میئر صادق خان ونڈسر کیسل میں شاہی ضیافت میں آنا چاہتے تھے لیکن ان کی درخواست پر انہیں مدعو نہیں کیا گیا۔برطانوی شاہی خاندان نے ٹرمپ کے اعزاز میں عشائیہ دیا۔صدر ٹرمپ نے صادق خان کو دنیا کے بدترین میئرز میں سے ایک قرار دیا اور لندن میں جرائم کی بڑھتی ہوئی شرح کی طرف اشارہ کرتے ہوئے کہا کہ وہاں کی صورتحال بہت خراب ہے۔ انہوں نے صادق خان کو امیگریشن پر آفت بھی قرار دیا۔
یاد رہے کہ امریکی صدر دو روزہ سرکاری دورے پر برطانیہ میں تھے۔ انہوں نے برطانیہ کے ساتھ ٹیکنالوجی پارٹنرشپ کے معاہدے پر دستخط کیے تاہم آج وہ برطانیہ کا سرکاری دورہ مکمل کرکے واپس امریکا پہنچ گئے ہیں۔برطانوی شاہی خاندان کی جانب سے امریکی صدر ڈونلڈ ٹرمپ کے اعزاز میں ونڈسر کیسل میں عشائیہ بھی دیا گیا جس میں شاہی خاندان کے افراد، سیاستدانوں اور امریکی ٹیک کمپنیوں سمیت دیگر بڑی کمپنیوں کے سربراہان نے شرکت کی۔
