Imran 
اردو ورلڈ کینیڈا ( ویب نیوز ) سیکرٹری اقتصادی امور ڈویژن نے قومی اسمبلی کی قائمہ کمیٹی برائے اقتصادی امور کو بریفنگ دیتے ہوئے بتایا کہ رواں سال پاکستان سعودی عرب اور چین سے 9 ارب ڈالر کا قرضہ لینے کا منصوبہ بنا رہا ہے انہوں نے کہا کہ اقتصادی امور کے حکام فنڈنگ کے لیے عرب رابطہ گروپ اور قطر فنڈ فار ڈویلپمنٹ سے رابطے میں ہیں۔ رواں مالی سال چین اور سعودی عرب سے 9 ارب ڈالر کا قرضہ اتارا جائے گا جبکہ دیامربھاشا ڈیم کے لیے رواں مالی سال بیرونی فنانسنگ کا انتظام کیا جائے گا.
سیکرٹری اقتصادی امور کا کہنا تھا کہ پاکستان کو رواں مالی سال میں 20.8 ارب ڈالر ادا کرنے ہیں، رواں مالی سال تیل اور اجناس کے قرضوں کے لیے اسلامی ترقیاتی بینک سے 500 ملین ڈالر ملیں گے تاہم سعودی عرب نے تیل فراہم کرنے میں تعاون نہیں کیا۔ ان کا مزید کہنا تھا کہ جنیوا ڈونر کانفرنس کے تحت پاکستان کو صرف 3 ارب ڈالر مل سکے، پاکستان پراجیکٹ فنانسنگ کی مد میں 10.7 ارب ڈالر کی یقین دہانی کرائی گئی ہے، رواں مالی سال کے پن بجلی منصوبے کے لیے ورلڈ بینک سے ایک ارب ڈالر ملیں گے۔ پہلا مرحلہ 2027 میں مکمل ہونا ہے۔ان کا مزید کہنا تھا کہ N5 کی تعمیر کا ٹھیکہ ایشین انفراسٹرکچر انویسٹمنٹ بینک کو دیا جائے گا۔
