اردو ورلڈ کینیڈا ( ویب نیوز )  یوتھ ورلڈ چیمپئن قومی باکسر عثمان وزیر نے ٹائٹل چیلنجر تنزانیہ کے باکسر فقیری سلیم کو پوائنٹس پر شکست دے کر اپنے عالمی ٹائٹل کا کامیابی سے دفاع کیا۔

گلگت میں منعقدہ قراقرم انٹرنیشنل باکسنگ چیمپئن شپ میں آٹھ راؤنڈ کی ورلڈ ٹائٹل فائٹ میں تمام ججز نے متفقہ فیصلے کی بنیاد پر عثمان وزیر کو فاتح قرار دیا۔

باؤٹ کے آغاز میں تنزانیہ کے باکسر فقیری سلیم نے عثمان وزیر کو دباؤ میں رکھا، عثمان وزیر ابتدائی راؤنڈ میں دفاع میں مصروف رہے۔ آٹھ راؤنڈ کی اس فائٹ میں پاکستانی باکسر عثمان وزیر نے آخری دو راؤنڈز کے دوران شاندار مقابلہ کیا اور اپنے مکے لگا کر حریف کو بے بس کر دیا۔باکسنگ میچ دیکھنے کے لیے پاکستان کے دو فاسٹ بولرز شاہنواز درمیرا اور میر حمزہ بھی میدان میں موجود تھے۔

میچ دیکھنے کے لیے تماشائیوں کی بڑی تعداد لالک جان اسٹیڈیم گلگت میں موجود تھی جنہوں نے عثمان وزیر کا میدان پہنچنے پر شاندار استقبال کیا۔مقابلے کے اختتام پر تمام ججز نے عثمان وزیر کے حق میں متفقہ فیصلہ سنایا تو میدان میں موجود حاضرین خوشی سے گونج اٹھے۔