متحدہ عرب امارات میں شدید گرمی کے باعث ایشیا کپ کے منتظمین کو میچوں کے اوقات کار میں تبدیلی کرنا پڑی۔ منتظمین کے مطابق کھلاڑیوں اور شائقین کو گرمی کے مضر اثرات سے بچانے کے لیے میچوں کو پہلے سے طے شدہ وقت سے نصف گھنٹہ تاخیر سے شروع کرنے کا فیصلہ کیا گیا ہے۔

تفصیلات کے مطابق اب 19 میں سے 18 میچ شام 6 بج کر 30 منٹ  پر شروع ہوں گے۔ اس فیصلے کو کرکٹ حلقوں اور شائقین نے خوش آئند قرار دیا ہے کیونکہ شام کے اوقات میں درجہ حرارت نسبتاً کم ہوتا ہے۔تاہم 15 ستمبر کو ابوظہبی میں کھیلے جانے والے دو میچ اس سے مستثنیٰ ہوں گے۔ پہلے میچ میں یو اے ای اور عمان کے درمیان ایک روزہ مقابلہ ہوگا جو سہ پہر 4 بجے شروع کیا جائے گا، جبکہ اسی شام دوسرا میچ  سری لنکا اور ہانگ کانگ  کے مابین ہوگا۔

ایشیا کپ کے سب سے بڑے اور سنسنی خیز مقابلے کا انعقاد  14 ستمبر کو ہوگا، جب پاکستان اور بھارت کی ٹیمیں ایک دوسرے کے مدمقابل ہوں گی۔ دونوں ٹیموں کے درمیان یہ میچ شائقین کرکٹ کے لیے سب سے زیادہ توجہ کا مرکز ہے۔

ٹورنامنٹ کے ابتدائی گروپ مرحلے کے بعد ہر گروپ کی سرفہرست دو ٹیمیں سپر فور مرحلے کے لیے کوالیفائی کریں گی۔ سپر فور کا آغاز 20 ستمبر سے ہوگا اور یہ مرحلہ 26 ستمبر تک جاری رہے گا، جس میں چھ میچ کھیلے جائیں گے۔سپر فور کے اختتام پر دو بہترین ٹیمیں فائنل میں جگہ بنائیں گی۔ ایشیا کپ کا فیصلہ کن معرکہ 28 ستمبر کو شیڈول ہے۔

ایشیا کپ ہمیشہ سے ایشیائی ممالک کے درمیان ایک بڑا کرکٹ ایونٹ رہا ہے، اور متحدہ عرب امارات کی شدید گرمی کے باعث منتظمین نے کھلاڑیوں اور شائقین کی صحت کو مدنظر رکھتے ہوئے یہ تبدیلیاں کی ہیں۔ ماہرین کے مطابق اگر یہ اقدام نہ اٹھایا جاتا تو کھلاڑیوں کی فٹنس اور میچوں کے معیار پر برا اثر پڑ سکتا تھا۔