اردوورلڈکینیڈا( ویب نیوز)اوٹاوا شہر نے اعلان کیا ہے کہ وہ 13 نئی فوٹو ریڈار کیمرے نصب کرنے کا عمل مکمل کرے گا، حالانکہ صوبے کے وزیرِ اعلیٰ ڈگ فورڈ نے پورے اونٹاریو میں اسپیڈ کیمروں پر پابندی لگانے کا منصوبہ بنایا ہے۔

شہر کے حکام کے مطابق، 3 اکتوبر کو ہدایت دی گئی تھی کہ فورڈ کے منصوبے کے پیشِ نظر نئے مقامات پر کیمروں یا کھمبوں کی تنصیب کو فوری طور پر روک دیا جائے۔ تاہم، جہاں کام پہلے سے شروع ہو چکا تھا، وہ منصوبے مکمل کیے جائیں گے۔حکام کا کہنا ہے کہ 13 کیمروں کی تنصیب مکمل کر لی جائے گی، مگر انہیں فی الحال فعال نہیں کیا جائے گا۔

اوٹاوا کے آٹومیٹڈ انفورسمنٹ پروگرام کے منیجر کنجن گھمیری نے کہاجب تک مجوزہ قانون سازی کو مکمل طور پر سمجھ نہیں لیا جاتا، کوئی نیا کیمرہ فعال نہیں کیا جائے گا۔ ہم اس دوران وہ تعمیراتی کام مکمل کر رہے ہیں جو معاہدوں کے تحت پہلے سے طے شدہ ہیں، تاکہ مقامات محفوظ رہیں اور منصوبے مؤخر نہ ہوں۔شہر نے رواں خزاں میں کل 24 نئے اسپیڈ کیمرے لگانے کا منصوبہ بنایا تھا۔

حکام کے مطابق، 13 مقامات پر کھمبے اور کیمرے نصب کیے جا چکے ہیں اور کام 14 نومبر تک مکمل ہونے کی توقع ہے۔گھمیری نے مزید کہاقانون سازی کے اثرات واضح ہونے کے بعد، شہر صوبائی قواعد کے مطابق مناسب اقدامات کرے گا۔

منگل کے روز، وزیرِ اعلیٰ ڈگ فورڈ نے ایک بار پھر اپنے منصوبے کا اعادہ کیا کہ وہ اس خزاں میں اسپیڈ کیمروں پر پابندی کے لیے قانون سازی متعارف کرائیں گے۔ انہوں نے ان کیمروں کو “سرکاری خزانہ بھرنے کا ذریعہ” (cash grab) قرار دیا۔

بدھ کو، اوٹاوا سٹی کونسل کے رکن ٹم ٹیرنی نے صوبائی حکومت سے مطالبہ کیا کہ اسکول زونز میں اسپیڈ کیمروں کی اجازت برقرار رکھی جائے، جبکہ میئر مارک سٹکلف نے بھی فورڈ کے منصوبے سے اختلاف ظاہر کیا۔فی الحال اوٹاوا شہر میں 60 فوٹو ریڈار کیمرے فعال ہیں۔