اردو ورلڈ کینیڈا ( ویب نیوز )اپر کوہستان کی تحصیل کنڈیا میں شدید بارشوں سے آنے والے سیلاب نے بڑے پیمانے پر تباہی مچائی ہے جس کے نتیجے میں کم از کم 50 مکانات اور ایک چھوٹا پاور ہا ئوس بہہ گیا۔
سیلاب میں 50 کے قریب گھر بہہ گئے ہیں متعلقہ ادارے کی طرف سے 5 ٹیمیں تشکیل دی گئیں جنہیں امدادی کاموں اور نقصانات کا تخمینہ لگانے کے لیے متاثرہ علاقوں میں روانہ کر دیا گیا ہے۔
ایک مقامی رضاکار نے اندازہ لگایا کہ سیلاب نے اس سے کہیں زیادہ تباہی مچائی۔
کنڈیا سے تعلق رکھنے والے ایک مقامی کارکن حفیظ الرحمن نے بتایا کہ سیلاب’ نے تحصیل کنڈیا کے دو دیہات کو اپنی لپیٹ میں لے لیا، جہاں ان کے اندازے کے مطابق 100 کے قریب گھر بہہ گئے اور سینکڑوں لوگ بے گھر ہو گئے۔
تاہم سیلابی صورتحال کے باعث کوئی جانی نقصان نہیں ہوا۔
انہوں نے کہا کہ اگرچہ خوش قسمتی سے سیلاب آنے سے پہلے ہی لوگ گا ئوں کو خالی کرنے میں کامیاب ہو گئے لیکن بڑی تعداد میں مویشی ہلاک ہو گئے جبکہ چار دیہات دنیش، بارتی، جاشوئی اور ڈنگوئی میں پانی کی فراہمی کے نظام کو نقصان پہنچا۔
حفیظ الرحمن نے کہا کہ مقامی لوگوں نے ابتدائی طور پر امدادی کام شروع کر دیا تھا اور متاثرہ خاندانوں کو محفوظ مقامات پر منتقل کر دیا گیا ہے۔
