اردوورلڈ کینیڈا( ویب نیوز) فیلڈ مارشل جنرل سید عاصم منیر نے چین کا سرکاری دورہ کیا، جہاں انہوں نے چین کی اعلیٰ سیاسی و عسکری قیادت سے متعدد اہم ملاقاتیں کیں۔ان ملاقاتوں میں پاکستان اور چین کے درمیان اسٹریٹجک شراکت داری کے عزم کو دہرایا گیا۔
پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل نے عوامی جمہوریہ چین کے نائب صدر ہان ژینگ اور وزیر خارجہ وانگ ای سے ملاقاتیں کیں۔ بات چیت میں خطے اور عالمی حالات، چین-پاکستان اقتصادی راہداری (CPEC) کے تحت باہمی روابط، اور مشترکہ چیلنجز سے نمٹنے کے لیے باہمی حکمت عملی پر تبادلہ خیال کیا گیا۔دونوں ممالک نے باہمی تعلقات کی گہرائی پر اطمینان کا اظہار کیا اور خودمختاری، برابری، کثیر الجہتی تعاون اور دیرپا علاقائی استحکام کے لیے عزم کی تجدید کی۔
چینی قیادت نے پاکستان کی مسلح افواج کے خطے میں امن اور استحکام کے کردار کو سراہتے ہوئے انہیں ایک مضبوط ستون قرار دیا۔فوجی سطح پر، جنرل عاصم منیر نے چین کے سینٹرل ملٹری کمیشن کے وائس چیئرمین جنرل ژانگ یوژیا، پیپلز لبریشن آرمی کے پولیٹیکل کمشنر جنرل چن ہوئی، اور چیف آف سٹاف لیفٹیننٹ جنرل کائی زائی جن سے علیحدہ علیحدہ ملاقاتیں کیں۔پیپلز لبریشن آرمی کے ہیڈکوارٹرز میں فیلڈ مارشل کو گارڈ آف آنر پیش کیا گیا، جو دونوں ممالک کی افواج کے درمیان دیرینہ تعلقات اور عسکری ہم آہنگی کی علامت قرار دیا گیا۔
آئی ایس پی آر کے مطابق، ان ملاقاتوں میں انسداد دہشت گردی، مشترکہ تربیت، دفاعی شعبے کی جدید کاری، اور ادارہ جاتی روابط سمیت سیکیورٹی تعاون پر تفصیلی گفتگو کی گئی۔ دونوں فریقین نے ہائبرڈ اور سرحد پار خطرات سے نمٹنے کے لیے آپریشنل ہم آہنگی اور اسٹریٹجک تعاون کو بڑھانے پر زور دیا۔
چینی فوجی قیادت نے دوطرفہ دفاعی تعاون کے استحکام پر مکمل اعتماد ظاہر کیا اور علاقائی امن میں پاکستان کے کردار کو سراہا۔
فیلڈ مارشل جنرل عاصم منیر نے چین کی مسلسل حمایت پر اظہارِ تشکر کیا اور اس عزم کا اعادہ کیا کہ پاکستان دفاعی تعاون سمیت تمام شعبوں میں پاک چین شراکت داری کو مزید وسعت دے گا۔
