اردو ورلڈ کینیڈا ( اردو ورلڈکینیڈا ) پاک افغان سرحد پر افغان فورسز کی بلا اشتعال فائرنگ پر سعودی عرب کا اظہار تشویش
پاکستانی فورسز کی جانب سے موثر جوابی کارروائی کے بعد سعودی عرب نے سرحدی کشیدگی پر گہری تشویش کا اظہار کرتے ہوئے دونوں ممالک پر زور دیا ہے کہ وہ تنازع کے حل کے لیے تحمل اور بات چیت کا راستہ اختیار کریں۔سعودی وزارت خارجہ کی جانب سے جاری بیان میں کہا گیا ہے کہ سعودی عرب کو اسلامی جمہوریہ پاکستان اور افغانستان کے درمیان سرحدی علاقوں میں حالیہ جھڑپوں اور کشیدگی پر گہری تشویش ہے۔
بیان میں مزید کہا گیا ہے کہ دونوں ممالک کشیدگی میں اضافے سے گریز کریں اور بات چیت، دانشمندی اور تحمل کا مظاہرہ کریں، تاکہ خطے میں امن و استحکام برقرار رہے۔سعودی حکومت نے اس موقع پر یہ بھی واضح کیا کہ وہ امن، استحکام اور خوشحالی کے فروغ بالخصوص پاکستانی اور افغان عوام کے بہتر مستقبل کے لیے تمام علاقائی اور بین الاقوامی کوششوں کی حمایت جاری رکھے گی۔سعودی وزارت خارجہ کے ایک بیان کے مطابق سعودی عرب خطے میں امن و سلامتی کو یقینی بنانے کا خواہاں ہے اور چاہتا ہے کہ پاکستان اور افغانستان کے برادر ممالک کے درمیان تعلقات بہتر ہوں تاکہ دونوں قومیں خوشحالی کی راہ پر آگے بڑھ سکیں۔
