اردوورلڈکینیڈا( ویب نیوز)مشہور بھارتی ٹیکنالوجی ماہر اور ہاٹ میل کے بانی صابر بھاٹیا کے بارے میں حالیہ انکشافات سامنے آئے ہیں کہ انہوں نے ماضی میں بالی ووڈ اداکارہ ایشوریہ رائے سے شادی کی خواہش ظاہر کی تھی، جس کے بعد ان کی سلمان خان کے ساتھ ایک دلچسپ اور غیر متوقع ملاقات ہوئی۔

بھارتی میڈیا کے مطابق، 2001 میں ایک ہائی پروفائل پارٹی میں صابر بھاٹیا ٹی وی میزبان سمی گریوال کے ہمراہ شریک تھے، جہاں ان کی ملاقات سلمان خان سے ہوئی۔ اس وقت خبریں یہ بھی تھیں کہ سلمان خان اور ایشوریہ رائے کے درمیان رومانوی تعلقات تھے۔

ملاقات کے دوران سلمان خان نے مذاق کے انداز میں صابر بھاٹیا سے پوچھا، "تو تم وہ ہو جو ایشوریہ سے شادی کرنا چاہتے ہو؟” جس پر صابر بھاٹیا نے ہنس کر کہا کہ یہ محض افواہ ہے۔ سلمان خان نے اس پر کہا، "وہ بہت اچھی لڑکی ہے۔” رپورٹ کے مطابق، پارٹی میں ایک موقع پر صابر کے ہاتھ پر سلمان خان کی جلتی ہوئی سگریٹ لگ گئی، جس پر سلمان نے ہنستے ہوئے کہا، "آخرکار تمہارے ہاتھوں پر راکھ آ ہی گئی۔”

یاد رہے کہ سلمان خان اور ایشوریہ رائے کے تعلقات بعد میں خراب ہوگئے اور دونوں کا بریک اپ ہوگیا، جبکہ صابر بھاٹیا نے بعد ازاں 2008 میں تانیہ شرما سے شادی کی، جو 2013 میں طلاق پر ختم ہوئی۔

صابر بھاٹیا نے 1996 میں ہاٹ میل متعارف کرایا، جو دنیا کی پہلی ویب بیسڈ ای میل سروس تھی، اور صرف ایک سال بعد مائیکروسافٹ نے اسے 400 ملین ڈالر میں خرید لیا تھا۔