اردوورلڈکینیڈا( ویب نیوز)کرغزستان کے صدر سادر ژاپاروف کے اعزاز میں وزیراعظم ہاؤس میں ایک پروقار استقبالیہ تقریب کا انعقاد کیا گیا۔وزیراعظم شہباز شریف نے صدر ژاپاروف کا پرتپاک استقبال کیا اور دونوں رہنماؤں نے ایک دوسرے کے لیے خیرسگالی کے جذبات کا اظہار کیا۔ اس موقع پر دونوں ممالک کے قومی ترانے بھی بجائے گئے۔صدر ژاپاروف کو مسلح افواج کے چاق و چوبند دستے کی جانب سے گارڈ آف آنر پیش کیا گیا، جس کا معائنہ انہوں نے کیا۔

استقبالیہ کے دوران دونوں رہنماؤں نے اپنے وفود کے ارکان کا تعارف بھی کرایا، اور بعد ازاں صدر ژاپاروف نے وزیراعظم ہاؤس کے احاطے میں ایک پودا بھی لگایا۔

یہ صدر ژاپاروف کا پہلا سرکاری دورہ پاکستان ہے۔ اس دوران معزز مہمان صدر مملکت آصف علی زرداری سے بھی ملاقات کریں گے اور دونوں ممالک کے درمیان وفود کی سطح پر مذاکرات متوقع ہیں۔

اس دورے کے دوران کرغزستان کے صدر پاکستان کرغزستان بزنس فورم سے خطاب بھی کریں گے، اور دونوں ملکوں کے درمیان متعدد اہم معاہدے اور مفاہمت کی یادداشتیں بھی دستخط کے لیے پیش کی جائیں گی۔