اردوورلڈکینیڈا( ویب نیوز)کینیڈا نے سیاحت کے فروغ اور بین الاقوامی تعلقات کو مضبوط بنانے کے لیے 13 ممالک کے شہریوں کو ویزا فری انٹری کی سہولت دینے کا اعلان کیا ہے۔ اس اقدام کے تحت مخصوص شرائط پوری کرنے والے مسافر اب بغیر ویزا کینیڈا کا سفر کر سکیں گے، جس سے بین الاقوامی دوروں اور کاروباری روابط میں اضافہ متوقع ہے۔
نئے ویزا فری ممالک کی فہرست میں اینٹیگوا اینڈ باربوڈا، ارجنٹینا، کوسٹا ریکا، مراکش، پاناما، فلپائن، سینٹ کٹس اینڈ نیوس، سینٹ لوسیا، سینٹ ونسنٹ اینڈ دی گریناڈینز، سیشلز، تھائی لینڈ، ٹرینیڈاڈ اینڈ ٹوباگو اور یوراگوئے شامل ہیں۔ خاص طور پر کیریبین کے پانچ ممالک اس فہرست میں شامل ہیں، جسے سفارتی تعلقات کے حوالے سے ایک مثبت پیش رفت قرار دیا جا رہا ہے۔
کینیڈا نے اس کے ساتھ ہی الیکٹرانک ٹریول آتھرائزیشن پروگرام کی سہولت بھی مزید ممالک تک بڑھا دی ہے۔ eTA ایک ڈیجیٹل اجازت نامہ ہے جو ویزا فری ممالک کے شہریوں کے لیے لازمی ہوگا اور قلیل مدتی دوروں کے لیے داخلے کے عمل کو آسان بنائے گا۔ حکام کے مطابق یہ سہولت صرف ہوائی سفر کے ذریعے آنے والے مسافروں کے لیے دستیاب ہوگی، اور وہ مسافر جو گزشتہ 10 سال میں کبھی کینیڈین ویزا حاصل کر چکے ہوں یا ان کے پاس امریکا کا درست نان امیگرنٹ ویزا موجود ہو، ویزا فری انٹری کے اہل ہوں گے۔ اہل افراد اس اجازت کے تحت کینیڈا میں زیادہ سے زیادہ چھ ماہ تک قیام کر سکتے ہیں۔
کینیڈین حکومت نے اس پالیسی کا مقصد عالمی سیاحتی مارکیٹ میں کینیڈا کو مزید پرکشش بنانا، بین الاقوامی روابط کو فروغ دینا اور اقتصادی ترقی میں اضافے کے مواقع پیدا کرنا قرار دیا ہے۔ اس اقدام سے سیاحت کے شعبے میں نئی سرمایہ کاری، ہوٹلنگ، ٹرانسپورٹ اور تفریحی خدمات کو فروغ ملنے کی توقع ہے، جبکہ مسافروں کے لیے داخلے کا عمل بھی مزید سہل اور شفاف ہو جائے گا۔
