اردو ورلڈ کینیڈا ( ویب نیوز ) پاکستان سپر لیگ (پی ایس ایل) کی تاریخ میں پہلی مرتبہ پلیئرز آکشن کا انعقاد کیا گیا
جس نے لیگ کے ڈھانچے میں ایک بڑی تبدیلی کا اشارہ دے دیا۔ آکشن میں 800 سے زائد ملکی و غیر ملکی کھلاڑی رجسٹرڈ ہوئے، جن میں سے ہر فرنچائز نے 16 سے 20 کھلاڑیوں پر مشتمل اپنے اسکواڈز کی تشکیل کا عمل شروع کر دیا۔ لیگ میں ایک اہم پیش رفت یہ بھی سامنے آئی کہ ملتان سلطانز کی ٹیم نئے مالکان کے ساتھ اب ’راولپنڈی‘ کے نام سے ایونٹ میں شرکت کرے گی، جسے پی ایس ایل کی تاریخ کی نمایاں تبدیلی قرار دیا جا رہا ہے۔
آکشن کے دوران پاکستانی آل راؤنڈر فہیم اشرف سب سے مہنگے کھلاڑیوں میں شامل رہے، جنہیں اسلام آباد یونائیٹڈ نے 8 کروڑ 50 لاکھ روپے میں خرید لیا۔ اسی طرح نسیم شاہ کو 8 کروڑ 65 لاکھ روپے میں راولپنڈی نے حاصل کیا، جبکہ فخر زمان کو لاہور قلندرز نے 7 کروڑ 95 لاکھ روپے میں دوبارہ اپنی ٹیم کا حصہ بنا لیا۔ حارث رؤف بھی 7 کروڑ 60 لاکھ روپے میں لاہور قلندرز کو واپس مل گئے۔
غیر ملکی کھلاڑیوں میں آسٹریلیا کے جارح مزاج اوپنر ڈیوڈ وارنر کو کراچی کنگز نے 7 کروڑ 90 لاکھ روپے میں خریدا، جبکہ جنوبی افریقا کے رائیلی روسو 5 کروڑ 55 لاکھ روپے میں کوئٹہ گلیڈی ایٹرز کے حصے میں آئے۔کراچی کنگز نے قومی ٹی ٹوئنٹی ٹیم کے کپتان سلمان علی آغا کو 5 کروڑ 85 لاکھ روپے اور وکٹ کیپر بیٹر اعظم خان کو 3 کروڑ 25 لاکھ روپے میں حاصل کیا۔ صاحبزادہ فرحان کو سیالکوٹ اسٹالینز نے 5 کروڑ 70 لاکھ روپے میں خرید کر اپنی بیٹنگ لائن مضبوط بنائی۔
دیگر نمایاں خریداریوں میں اسامہ میر (3 کروڑ 50 لاکھ، لاہور قلندرز)، رشاد حسین (3 کروڑ، راولپنڈی)، محمد علی (2 کروڑ 15 لاکھ، حیدرآباد)، جہانداد خان (2 کروڑ 50 لاکھ، کوئٹہ گلیڈی ایٹرز) اور عامر جمال (ایک کروڑ 90 لاکھ، پشاور زلمی) شامل ہیں۔ نوجوان ٹیلنٹ مہران ممتاز اور فیصل اکرم کو ایک کروڑ 25 لاکھ روپے میں بالترتیب اسلام آباد یونائیٹڈ اور کوئٹہ گلیڈی ایٹرز نے حاصل کیا، جبکہ عرفات منہاس ایک کروڑ 10 لاکھ روپے میں کوئٹہ کا حصہ بنے۔
دوسری جانب چند بڑے نام حیران کن طور پر کسی فرنچائز کی توجہ حاصل نہ کر سکے۔ عماد وسیم، حسین طلعت، دانش عزیز، محمد حسنین، رومان رئیس اور کرس جارڈن سمیت کئی کھلاڑیوں کو آکشن میں خریدار نہ مل سکا، جو شائقین کرکٹ کے لیے غیر متوقع خبر تھی۔آکشن تقریب میں چیئرمین پی سی بی محسن نقوی کی آمد پر فرنچائز مالکان نے ان کا پرتپاک استقبال کیا۔ اس موقع پر انہوں نے مالکان کو ٹی ٹوئنٹی ورلڈکپ 2026 کے لیے تیار کی گئی ’مارخور‘ تھیم والی خصوصی کسٹمائزڈ ٹی شرٹس بطور تحفہ پیش کیں۔ماہرین کے مطابق پلیئرز آکشن کا آغاز پی ایس ایل کو مزید مسابقتی اور جدید بنانے کی جانب ایک اہم قدم ہے، جس سے لیگ میں نئی حکمت عملیوں، مضبوط اسکواڈز اور سنسنی خیز مقابلوں کی توقع کی جا رہی ہے۔
