ا ردو ورلڈ کینیڈا ( ویب نیوز ) Russia نے میٹا کی ملکیت مقبول میسجنگ ایپ WhatsApp کو باضابطہ طور پر بلاک کر دیا ہے
جس کے نتیجے میں ملک بھر میں کروڑوں صارفین اس سروس سے محروم ہو گئے ہیں۔ یہ اقدام روسی حکومت کی جانب سے غیر ملکی ڈیجیٹل پلیٹ فارمز کے خلاف جاری سخت پالیسیوں کا تسلسل قرار دیا جا رہا ہے۔
روسی حکام کی جانب سے اس فیصلے کے اشارے پہلے ہی دیے جا چکے تھے، اور 2025 کے دوران واٹس ایپ پر ممکنہ پابندی کے حوالے سے بیانات سامنے آتے رہے۔ تازہ رپورٹس کے مطابق واٹس ایپ کو روس کی قومی آن لائن ڈائریکٹری سے ہٹا دیا گیا ہے، جس کے بعد یہ ایپ عملی طور پر روسی انٹرنیٹ نظام سے خارج ہو چکی ہے۔
اعداد و شمار کے مطابق روس میں واٹس ایپ استعمال کرنے والوں کی تعداد 10 کروڑ سے زائد ہے، اس لیے اس فیصلے کے اثرات نہ صرف عام صارفین بلکہ کاروباری اداروں، میڈیا اور سماجی رابطوں پر بھی نمایاں طور پر محسوس کیے جا رہے ہیں۔روسی حکومت اس سے قبل یہ خواہش ظاہر کر چکی ہے کہ شہری ایک مقامی میسجنگ ایپ ’’میکس‘‘ کی جانب منتقل ہوں، جسے چینی ایپ WeChat کے طرز پر تیار کیا گیا ہے۔ تاہم ناقدین کا کہنا ہے کہ اس مقامی ایپ میں اینڈ ٹو اینڈ انکرپشن جیسی بنیادی سیکیورٹی سہولت موجود نہیں، جس کے باعث صارفین کی پرائیویسی اور ڈیٹا تحفظ پر سنجیدہ سوالات جنم لے رہے ہیں۔
دوسری جانب واٹس ایپ کی مالک کمپنی Meta نے روسی اقدام پر سخت ردعمل دیا ہے۔ کمپنی کا کہنا ہے کہ روسی حکومت صارفین کو جان بوجھ کر ایسی ایپس کی طرف دھکیلنا چاہتی ہے جو ریاستی نگرانی کے تحت کام کرتی ہیں۔ میٹا کے مطابق اس فیصلے سے 10 کروڑ سے زائد افراد محفوظ اور نجی کمیونیکیشن کے حق سے محروم ہو جائیں گے۔
یہ پہلا موقع نہیں کہ روس نے غیر ملکی سوشل میڈیا اور کمیونیکیشن پلیٹ فارمز کے خلاف سخت اقدامات کیے ہوں۔ حال ہی میں Telegram کو بھی آن لائن ڈائریکٹری سے ہٹا دیا گیا تھا، جبکہ اس سے قبل Facebook اور Instagram تک رسائی بھی محدود یا بند کی جا چکی ہے۔ اس کے علاوہ YouTube پر پابندی سے متعلق اطلاعات بھی سامنے آئی ہیں، اگرچہ اس کی مکمل تفصیلات تاحال واضح نہیں ہو سکیں۔
یاد رہے کہ جولائی 2025 میں روسی پارلیمان کے ایک رکن، جو آئی ٹی انڈسٹری کی نگرانی کے ذمہ دار ہیں، نے عندیہ دیا تھا کہ واٹس ایپ کو بھی ان غیر ملکی ایپس کی فہرست میں شامل کیا جا سکتا ہے جن پر پابندی عائد کی جائے گی۔ اس کے علاوہ روس پہلے ہی میٹا کو انتہا پسند تنظیموں کی فہرست میں شامل کر چکا ہے، جبکہ روسی صدر 2025 میں غیر ملکی کمیونیکیشن ایپس کے خلاف سخت اقدامات کی ہدایات بھی جاری کر چکے ہیں۔