اردو ورلڈ کینیڈا ( ویب نیوز ) کینیڈا بارڈر سروسز ایجنسی (CBSA) نے منشیات اسمگلنگ کے خلاف بڑی کارروائی کرتے ہوئے
تقریباً ایک ہزار کلوگرام سے زائد کوکین اور دیگر منشیات قبضے میں لے لیں۔ حکام کے مطابق یہ کارروائیاں گزشتہ سال نومبر اور دسمبر میں صوبہ البرٹا کے کوٹس بارڈر کراسنگ پوائنٹ پر کی گئیں، جہاں تین مختلف تجارتی ٹرک کینیڈا میں داخل ہونے کی کوشش کر رہے تھے۔
سی بی ایس اے کے بیان کے مطابق پہلی کارروائی 26 نومبر 2025 کو کی گئی۔ ایک ٹرک جو بظاہر الیکٹرولائٹ مشروبات سے لدا ہوا تھا اور کیلگری جا رہا تھا، معمول کی جانچ پڑتال کے لیے روکا گیا۔ سرحدی اہلکاروں نے سونگھنے والے کتوں کی مدد سے تلاشی لی تو ٹرک سے 461 کلوگرام کوکین اور 43 کلوگرام ہیروئن برآمد ہوئی۔ منشیات کو مہارت سے سامان کے اندر چھپایا گیا تھا۔
دوسری کارروائی ایک ہفتے بعد 2 دسمبر 2025 کو عمل میں آئی، جب ایک خالی ٹرک سرحد عبور کرنے کی کوشش کر رہا تھا۔ حکام نے مشتبہ ہونے پر اس کی مکمل تلاشی لی جس کے نتیجے میں 300 کلوگرام کوکین اور تقریباً 400 گرام مشتبہ ڈوپ برآمد ہوئی۔تیسری کارروائی 18 دسمبر کو کی گئی۔ اس بار ویکیوم پارٹس لے جانے والے ایک ٹرک کی جانچ پڑتال کے دوران منشیات کا سراغ لگانے والے کتوں نے نشاندہی کی، جس کے بعد تفصیلی تلاشی میں 206 کلوگرام میتھم فیٹامائن برآمد ہوئی۔
حکام کا کہنا ہے کہ تینوں واقعات میں ملوث ٹرک ڈرائیوروں کو گرفتار کر کے ان پر منشیات اسمگلنگ کے الزامات عائد کر دیے گئے ہیں۔ مقدمات کی مزید تحقیقات جاری ہیں اور امکان ہے کہ اس نیٹ ورک کے دیگر افراد تک بھی تفتیش کا دائرہ بڑھایا جائے گا۔سی بی ایس اے کے ترجمان نے کہا کہ سرحدی اہلکار جدید ٹیکنالوجی اور تربیت یافتہ کتوں کی مدد سے منشیات کی اسمگلنگ روکنے کے لیے مسلسل متحرک ہیں۔ انہوں نے واضح کیا کہ کینیڈا میں غیر قانونی منشیات کی ترسیل روکنا قومی سلامتی اور عوامی تحفظ کے لیے اولین ترجیح ہے۔حکام کے مطابق یہ حالیہ کارروائیاں اس بات کا ثبوت ہیں کہ اسمگلرز کی جانب سے نت نئے طریقے اختیار کیے جا رہے ہیں، تاہم سرحدی ادارے بھی ان کوششوں کو ناکام بنانے کے لیے پوری طرح مستعد ہیں۔
