اردو ورلڈ کینیڈا ( ویب نیوز ) رحمتوں اور برکتوں کے مہینے رمضان المبارک کی پہلی تراویح کے موقع پر مسجدِ حرام اور مسجدِ نبویؐ
میں ایمان افروز اور روح پرور مناظر دیکھنے میں آئے۔ دنیا بھر سے آئے ہزاروں فرزندانِ اسلام بارگاہِ الٰہی میں سجدہ ریز ہوئے اور ماہِ صیام نصیب ہونے پر اللہ تعالیٰ کا شکر ادا کرتے ہوئے مغفرت اور رحمت کی دعائیں مانگیں۔
مسجدِ حرام میں خانۂ کعبہ کے گرد عقیدت مندوں کی بڑی تعداد نے عشاء اور تراویح کی نماز ادا کی۔ روح پرور تلاوتِ قرآن، اجتماعی دعاؤں اور اشک بار آنکھوں کے مناظر نے ماحول کو رقت آمیز بنا دیا۔ سکیورٹی اور انتظامی امور کے لیے سعودی حکام کی جانب سے خصوصی انتظامات کیے گئے تھے تاکہ نمازیوں کو کسی قسم کی دشواری کا سامنا نہ ہو۔
مدینہ منورہ میں مسجدِ نبویؐ کے صحن اور اندرونی حصے نمازیوں سے بھر گئے۔ روضۂ رسول ﷺ کے قرب میں عبادت کا شرف حاصل کرنے والوں نے خصوصی طور پر امتِ مسلمہ کی سلامتی اور مظلوم مسلمانوں کے لیے دعائیں کیں۔اطلاعات کے مطابق سعودی عرب، متحدہ عرب امارات، قطر، کویت، بحرین، عراق، یمن، لبنان، فلسطین اور افغانستان میں رمضان المبارک کا چاند نظر آنے کے بعد آج پہلا روزہ رکھا جا رہا ہے۔
جمعرات سے آغاز کرنے والے ممالک
دوسری جانب ترکیہ، سویڈن، آسٹریلیا، مصر، عمان، ملائیشیا، سنگاپور، برونائی، انڈونیشیا، فلپائن، آذربائیجان، قازقستان، کرغزستان، ازبکستان، فرانس اور جاپان میں پہلا روزہ جمعرات کو رکھا جائے گا۔ادھر امریکا، کینیڈا، بیلجیئم اور برطانیہ میں مسلم برادری کے مختلف مکاتبِ فکر کی جانب سے چاند کی رویت کے حوالے سے اختلاف پایا جاتا ہے، جس کے باعث بعض حلقوں نے آج اور دیگر نے جمعرات سے رمضان المبارک کے آغاز کا اعلان کیا ہے۔
ماہرین کے مطابق مختلف ممالک میں چاند دیکھنے کے طریقۂ کار اور فلکیاتی بنیادوں پر اختلاف کی وجہ سے رمضان کے آغاز میں ایک دن کا فرق معمول کی بات ہے، تاہم دنیا بھر کے مسلمان یکساں جوش و جذبے کے ساتھ عبادت، صبر اور ایثار کے اس بابرکت مہینے کا استقبال کر رہے ہیں۔
