اردوورلڈکینیڈا(ویب نیوز)ترجمان دفتر خارجہ نے امریکی ڈائریکٹر نیشنل انٹیلیجنس کے بیان پر ردعمل دیتے ہوئے پاکستان کے میزائل پروگرام کو ممکنہ خطرہ قرار دینے کے دعوے کو مسترد کر دیا۔

ترجمان کے مطابق پاکستان کی اسٹریٹجک صلاحیتیں مکمل طور پر دفاعی نوعیت کی حامل ہیں اور ان کا مقصد قومی خودمختاری کا تحفظ اور ملک میں امن و استحکام کو برقرار رکھنا ہے۔

انہوں نے کہا کہ پاکستان کا میزائل پروگرام بین البرِاعظمی حد سے کہیں کم ہے اور بھارت کے مقابلے میں یہ قابلِ اعتماد کم از کم دفاعی صلاحیت کے نظریے پر مبنی ہے، جبکہ بھارت کے زائد فاصلے تک مار کرنے والے میزائل خطے کے لیے باعثِ تشویش ہیں۔

ترجمان دفتر خارجہ نے مزید کہا کہ پاکستان امریکا کے ساتھ باہمی احترام، عدم امتیاز اور تعمیری روابط کے فروغ کے لیے پرعزم ہے اور ایک متوازن اور محتاط طرزِ عمل اختیار کرنے پر زور دیتا ہے۔