ارد و ورلڈ کینیڈا ( ویب نیوز ) کینیڈا کے صوبے برٹش کولمبیا میں کام کرنے والی برطانیہ سے تعلق رکھنے والی
ایک تجربہ کار دائی کو انگریزی زبان کے ٹیسٹ سے متعلق تکنیکی مسئلے کے باعث ملک بدری کے خطرے کا سامنا ہے، جس نے امیگریشن نظام پر کئی سوالات کھڑے کر دیے ہیں۔متاثرہ دائی ہیدر گلکرسٹ، جو وکٹوریہ میں خدمات انجام دے رہی تھیں، نے بتایا کہ وہ اپنے شوہر کے انتقال کے بعد نئی زندگی شروع کرنے کے لیے کینیڈا آئی تھیں۔ انہوں نے یہاں دائی کے طور پر نہ صرف اپنی پیشہ ورانہ صلاحیتوں کا لوہا منوایا بلکہ مریضوں کی دیکھ بھال میں بھی نمایاں کردار ادا کیا۔
گلکرسٹ کے مطابق انہوں نے جولائی 2025 میں انگریزی زبان کا امتحان کامیابی سے پاس کیا تھا، تاہم آن لائن امیگریشن درخواست کے دوران انہیں اپنے ٹیسٹ کے نتائج اپ لوڈ کرنے کا کوئی آپشن فراہم نہیں کیا گیا۔ مزید یہ کہ درخواست کی چیک لسٹ میں بھی اس ٹیسٹ کا کوئی واضح ذکر موجود نہیں تھا، جس کے باعث نتائج جمع نہ ہو سکے۔اس تکنیکی یا انتظامی خامی کے نتیجے میں ان کا ورک پرمٹ منسوخ کر دیا گیا، اور انہیں اپنی پریکٹس فوری طور پر بند کرنا پڑی۔ گلکرسٹ کا کہنا ہے کہ اس فیصلے نے نہ صرف ان کے کیریئر کو متاثر کیا بلکہ ان کی ذاتی زندگی پر بھی گہرے اثرات مرتب کیے ہیں۔انہوں نے مزید بتایا کہ اسکاٹ لینڈ میں اپنے کیریئر کے دوران انہوں نے برٹش کولمبیا کے مقابلے میں تقریباً دو گنا زیادہ دائیوں کو تربیت دی، مگر کینیڈا میں ان کے اس وسیع تجربے کو خاطر میں نہیں لایا گیا۔
