اردوورلڈکینیڈا(ویب نیوز)پاکستان تحریک انصاف (پی ٹی آئی) کی سینئر قیادت نے بانی پارٹی عمران خان کی رہائی کے لیے ٹاسک فورس تشکیل دینے کے اقدام کی مخالفت کر دی ہے۔ پارٹی ذرائع کے مطابق سینئر رہنماؤں نے وزیراعلیٰ خیبرپختونخوا سہیل آفریدی کو اپنی رائے سے آگاہ کیا ہے۔

ذرائع کا کہنا ہے کہ پاکستان اور دنیا اس وقت مشکل حالات سے گزر رہی ہے، اس لیے ٹاسک فورس کے بجائے مذاکرات کا راستہ اپنانا زیادہ مناسب ہوگا۔ سینئر قیادت نے خبردار کیا کہ اگر اس بار اسلام آباد پر کوئی اقدام کیا گیا تو پارٹی کو شدید نقصان پہنچ سکتا ہے۔

قیادت نے مزید کہا کہ موجودہ حالات میں احتجاج کرنا کوئی دانشمندانہ فیصلہ نہیں ہوگا کیونکہ ٹاسک فورس کا بنیادی کام احتجاج کرنا ہے، اور اس وقت احتجاج کرنا پارٹی کے ورکرز کے لیے موزوں نہیں ہے۔

واضح رہے کہ وزیراعلیٰ خیبرپختونخوا سہیل آفریدی نے 19 اپریل کو عمران خان کی رہائی کے لیے ٹاسک فورس تشکیل دینے کا اعلان کیا تھا۔