10
اردوورلڈکینیڈا(ویب نیوز)راولپنڈی میں سکیورٹی خدشات کے پیش نظر پندرہ روز کے لیے دفعہ 144 نافذ کر دی گئی ہے۔
اس پابندی کے تحت ہر قسم کے جلسے، جلوس، ریلیاں، دھرنے اور احتجاج مکمل طور پر ممنوع قرار دیے گئے ہیں۔ پانچ یا اس سے زائد افراد کے اجتماعات پر بھی پابندی عائد کی گئی ہے۔
پابندی کے تحت اسلحہ کی نمائش، اشتعال انگیز اور نفرت پھیلانے والی تقاریر، موٹر سائیکل کی ڈبل سواری، اور لاؤڈ اسپیکر کے استعمال پر بھی پابندی عائد کر دی گئی ہے۔
پولیس کو ہدایت دی گئی ہے کہ پابندیوں کی خلاف ورزی کرنے والوں کے خلاف سخت قانونی کارروائی عمل میں لائی جائے۔
ڈپٹی کمشنر راولپنڈی نے بتایا کہ امن و امان کو خراب کرنے کی منصوبہ بندی کی رپورٹس موصول ہوئی ہیں، اور شہریوں اور املاک کی حفاظت کے لیے یہ اقدامات کیے گئے ہیں۔
