اردو ورلڈ کینیڈا ( ویب نیوز ) امریکی صدر نے ایران کے ساتھ جاری مذاکرات کے تناظر میں سخت مؤقف اختیار کرتے ہوئے خبردار کیا ہے کہ اگر بات چیت ناکام ہوئی تو امریکا پہلے سے زیادہ شدت کے ساتھ فوجی کارروائی کر سکتا ہے۔
امریکی اخبار نیو یارک پوسٹ کو ٹیلیفون پر دیے گئے ایک انٹرویو میں صدر ٹرمپ نے کہا کہ امریکا اور ایران کے درمیان اسلام آباد میں ہونے والے مذاکرات کے نتائج بہت جلد سامنے آ جائیں گے۔ ان کے مطابق، “آئندہ 24 گھنٹوں میں واضح ہو جائے گا کہ یہ مذاکرات کامیاب ہوتے ہیں یا نہیں۔”صدر ٹرمپ نے مزید کہا کہ اگر سفارتی کوششیں ناکام ہوئیں تو امریکا مزید طاقت کے ساتھ فوجی آپریشن شروع کرے گا، جو ماضی کی کارروائیوں سے زیادہ سخت ہو سکتے ہیں۔ انہوں نے اس صورتحال کو نہایت حساس قرار دیتے ہوئے کہا کہ امریکا اپنے مفادات کے تحفظ کے لیے ہر ممکن قدم اٹھائے گا۔
اس سے قبل صدر ٹرمپ نے سوشل میڈیا پر ایک مختصر بیان میں “دنیا کا سب سے طاقتور ری سیٹ” کا ذکر کیا تھا، جسے امریکی میڈیا نے ایران کے ساتھ جاری مذاکرات سے جوڑا ہے۔دوسری جانب، آج اسلام آباد میں امریکا اور ایران کے اعلیٰ سطحی وفود کے درمیان اہم مذاکرات متوقع ہیں۔ امریکی وفد میں نائب صدر جے ڈی وینس خصوصی نمائندہ Steve Witkoff اور صدر ٹرمپ کے داماد Jared Kushner شامل ہیں۔
ایرانی وفد کی قیادت وزیر خارجہ عباس عراقچی کر رہے ہیں، جبکہ پارلیمنٹ کے اسپیکر بھی اس میں شامل ہیں۔پاکستانی حکومت نے اس اہم سفارتی موقع پر دونوں ممالک کے وفود اور بین الاقوامی صحافیوں کے لیے خصوصی سکیورٹی اور ویزا سہولیات فراہم کی ہیں، جبکہ دارالحکومت میں سکیورٹی کے سخت انتظامات کیے گئے ہیں۔تجزیہ کاروں کے مطابق یہ مذاکرات خطے میں کشیدگی کم کرنے کے لیے نہایت اہم ہیں، اور ان کی کامیابی یا ناکامی کے اثرات نہ صرف مشرقِ وسطیٰ بلکہ عالمی سطح پر بھی محسوس کیے جائیں گے۔
