15
اردوورلڈکینیڈا(ویب نیوز)وزیرِاعظم شہباز شریف نے روضہ رسول ﷺ پر حاضری دی اور دنیا بھر میں امن و استحکام کے لیے خصوصی دعائیں کیں۔
وزیرِاعظم دفتر کے مطابق محمد شہباز شریف جدہ سے مدینہ منورہ پہنچے جہاں مدینہ منورہ کے گورنر شہزادہ سلمان بن سلطان بن عبدالعزیز آل سعود نے ان کا اور پاکستانی وفد کا استقبال کیا۔
وزیرِاعظم نے مدینہ منورہ میں مسجد نبوی ﷺ میں حاضری دی اور ملک و قوم کی ترقی سمیت دنیا بھر میں امن و آشتی کے لیے دعائیں کیں۔ اس موقع پر ان کے لیے روضہ رسول ﷺ کے دروازے بھی کھولے گئے جہاں انہوں نے خصوصی طور پر حاضری دی، درود و سلام پیش کیا اور عقیدت کا اظہار کیا۔
بعد ازاں وزیرِاعظم نے اپنے دورے کے اختتام پر مدینہ منورہ سے دوحہ روانہ ہونا ہے، جہاں ان کی ملاقات قطر کے امیر شیخ تمیم بن حمد آل ثانی سے طے ہے۔ اس ملاقات میں خطے کی صورتحال اور باہمی امور پر تبادلہ خیال کیا جائے گا۔
