اردوورلڈکینیڈا(ویب نیوز)پنجاب کی وزیراعلیٰ مریم نواز شریف نے صوبے کے دس اضلاع میں نئی برقی بسیں فراہم کرنے کی منظوری دے دی ہے۔
وزیراعلیٰ کی زیر صدارت ایک خصوصی اجلاس میں صوبے میں جدید اور ماحول دوست ٹرانسپورٹ نظام کے فروغ سے متعلق مختلف منصوبوں کا تفصیلی جائزہ لیا گیا۔ اجلاس میں مفت سفری سہولت، برقی بسوں، برقی ٹیکسی منصوبے اور ماس ٹرانزٹ منصوبوں پر پیش رفت کا بھی جائزہ لیا گیا۔
اجلاس میں بتایا گیا کہ مفت سفری سہولت پروگرام کے تحت اکیس راستوں پر ایک لاکھ پچیس ہزار سے زائد مسافر مستفید ہو چکے ہیں جبکہ مجموعی طور پر تین ہزار پانچ سو ساٹھ بس سفر مکمل کیے جا چکے ہیں۔
دس اضلاع اٹک، بھکر، حافظ آباد، خانیوال، لیہ، شیخوپورہ، گوجرانوالہ، سیالکوٹ، منڈی بہاؤالدین اور اوکاڑہ میں نئی برقی بسیں فراہم کرنے کی منظوری دی گئی ہے۔ منصوبے کے مطابق رواں ماہ ایک سو بسیں، مئی کے وسط تک تین سو پچاس اور جون کے آخر تک مزید دو سو چونسٹھ بسیں پہنچ جائیں گی۔ ہر ڈویژن میں برقی بسوں کے لیے خصوصی ڈپو بھی قائم کیے جائیں گے۔
وزیراعلیٰ نے تحصیل سطح پر پندرہ سو برقی بسیں چلانے کے لیے جامع منصوبہ طلب کیا ہے۔ اجلاس میں گوجرانوالہ اور فیصل آباد میں ماس ٹرانزٹ نظام کے منصوبوں پر بھی پیش رفت کا جائزہ لیا گیا۔
برقی ٹیکسی منصوبے کے تحت مئی میں ایک سو چورانوے اور جون میں دو سو آٹھ ٹیکسیاں شامل کرنے کی پیش رفت بھی رپورٹ کی گئی۔
وزیراعلیٰ نے میٹرو بس اسٹیشنوں کی مرمت اور تعمیر جلد مکمل کرنے کی ہدایت دی اور نئے ڈیزائن کی منظوری بھی دی۔ لاہور میں جدید بس اسٹیشنوں کے قیام کے منصوبے پر بھی غور کیا گیا۔
اجلاس میں سرکاری ملازمین کے لیے برقی موٹر سائیکل منصوبے کی اصولی منظوری بھی دے دی گئی۔
