اردوورلڈکینیڈا(ویب نیوز)پاکستان فضائیہ کے سربراہ ظہیر احمد بابر سدھو نے کہا ہے کہ پاکستان ایک پرامن ملک ہے جو مذاکرات پر یقین رکھتا ہے، تاہم کسی بھی جارحیت کی صورت میں فوری اور بھرپور جواب دیا جائے گا۔
پاکستان ملٹری اکیڈمی میں پاسنگ آؤٹ پریڈ سے خطاب کرتے ہوئے انہوں نے دوست ممالک کے کیڈٹس کو مبارکباد دی اور کہا کہ خواتین کی بڑھتی ہوئی شمولیت خوش آئند ہے۔ ان کا کہنا تھا کہ یہ ادارہ دنیا کی بہترین عسکری درسگاہوں میں شمار ہوتا ہے جہاں نوجوانوں کی اعلیٰ معیار کی تربیت کی جاتی ہے۔
انہوں نے کیڈٹس کو مخاطب کرتے ہوئے کہا کہ ان کی بنیادی ذمہ داری ملک کی سلامتی کو یقینی بنانا ہے۔ ان کا کہنا تھا کہ حالیہ معرکوں میں پاک فوج کی حکمت عملی کو دنیا نے تسلیم کیا، جبکہ پاکستان فضائیہ نے دشمن کے طیارے گرا کر اپنی پیشہ ورانہ مہارت کا عملی مظاہرہ کیا۔
ایئر چیف نے واضح کیا کہ پاکستان کی سرزمین کے دفاع کیلئے ہر وقت تیار ہیں اور کسی بھی مہم جوئی کا بھرپور جواب دیا جائے گا۔ انہوں نے اس عزم کا اعادہ کیا کہ پاکستان مقبوضہ کشمیر کے عوام کی اخلاقی و سفارتی حمایت جاری رکھے گا اور مسئلہ کشمیر کو اقوام متحدہ کی قراردادوں اور کشمیری عوام کی خواہشات کے مطابق حل ہونا چاہیے۔
انہوں نے مزید کہا کہ عالمی امن کے قیام میں پاکستان کی سیاسی اور عسکری قیادت کا کردار قابلِ تعریف ہے، جبکہ پاسنگ آؤٹ پریڈ میں شرکت ان کیلئے اعزاز کی بات ہے۔ خطاب کے اختتام پر انہوں نے پاکستان کی بقا اور ترقی کیلئے نیک تمناؤں کا اظہار کیا۔
