اردو ورلڈکینیڈا( ویب نیوز) گلوبل افیئرز کینیڈا نے دفتری جگہ کی کمی کے باعث اپنے ملازمین کے لیے نئی حاضری پالیسی میں عارضی نرمی کا اعلان کیا ہے

جسسے وفاقی ملازمین کو وقتی ریلیف مل گیا ہے۔تفصیلات کے مطابق کینیڈا کے ٹریژری بورڈ آف کینیڈا سیکرٹریٹ کی جانب سے جاری ہدایات کے تحت سرکاری اداروں میں حاضری بڑھانے کا منصوبہ بنایا گیا تھا۔ اس منصوبے کے مطابق سینئر افسران کو 4 مئی سے ہفتے کے پانچوں دن دفتر میں حاضر ہونا ہوگا

دیگر سرکاری ملازمین کے لیے 6 جولائی سے کم از کم چار دن کی حاضری لازمی قرار دی گئی تھی۔تاہم گلوبل افیئرز کینیڈا نے عملی مسائل، خصوصاً دفتر میں محدود جگہ کے پیش نظر اس پالیسی پر فوری مکمل عمل درآمد مؤخر کر دیا ہے۔ نئے عبوری انتظامات کے تحت مختلف سطح کے ملازمین کے لیے حاضری کا شیڈول کچھ یوں ترتیب دیا گیا ہے

4 مئی سے تمام سینئر افسران ہفتے کے پانچ دن دفتر میں کام کریں گے۔منیجرز اور ڈپٹی ڈائریکٹرز 6 جولائی سے 15 ستمبر کے دوران ہفتے میں چار دن دفتر آئیں گے۔دیگر ملازمین فی الحال ہفتے میں تین دن دفتر میں حاضر ہوں گے۔ادارے کے مطابق جیسے جیسے نئی دفتری جگہیں دستیاب ہوتی جائیں گی حاضری کے تقاضوں میں بتدریج اضافہ کیا جائے گا تاکہ پالیسی کو مکمل طور پر نافذ کیا جا سکے۔

دوسری جانب پبلک سروس الائنس آف کینیڈا کی صدر شیرون ڈی سوزا نے اس فیصلے پر سخت تنقید کی ہے۔ ان کا کہنا ہے کہ حکومت نے یہ پالیسی بغیر مناسب منصوبہ بندی کے نافذ کرنے کی کوشش کی، جس سے ملازمین کو غیر ضروری دباؤ اور مشکلات کا سامنا کرنا پڑ رہا ہے۔ماہرین کے مطابق ہائبرڈ ورک ماڈل کے اس دور میں سرکاری اداروں کے لیے سب سے بڑا چیلنج محدود وسائل کے ساتھ مؤثر ورکنگ ماحول فراہم کرنا ہے، اور یہی وجہ ہے کہ ایسی پالیسیوں میں بار بار ردوبدل دیکھنے میں آ رہا ہے۔