اردوورلڈکینیڈا(ویب نیوز)کینیڈا کے شہر مونٹریال کے نواحی علاقے ویسٹ ماؤنٹ میں واقع ایک یہودی عبادت گاہ کو آگ لگانے کی مبینہ کوشش کے الزام میں اڑتیس سالہ شخص کے خلاف چھ مقدمات درج کر لیے گئے ہیں۔
استغاثہ کی جانب سے عائد کردہ الزامات میں آتش زنی، آگ لگانے والا مواد رکھنے، دھماکا خیز مادہ استعمال کرنے اور خطرناک مقصد کے لیے ہتھیار رکھنے کے الزامات شامل ہیں۔
پیر کے روز مونٹریال کی ایک عدالت میں ملزم کی سماعت ہونا تھی، تاہم استغاثہ کی درخواست پر کرائے جانے والے نفسیاتی معائنے کی رپورٹ مکمل نہ ہونے کے باعث جج نے کارروائی ملتوی کر دی۔
پولیس کے مطابق جمعہ کی علی الصبح ویسٹ ماؤنٹ میں واقع "ٹیمپل ایمانو ایل بیت شولوم” نامی یہودی عبادت گاہ سے متعلق اطلاع موصول ہوئی کہ ایک شخص عمارت کو آگ لگانے کی کوشش کر رہا ہے۔ اطلاع ملتے ہی پولیس اور ہنگامی امدادی اداروں کے اہلکار موقع پر پہنچ گئے۔
حکام کا کہنا ہے کہ واقعے کے وقت عبادت گاہ خالی تھی اور فوری کارروائی کی بدولت عمارت کو معمولی نقصان پہنچا، جبکہ کسی جانی نقصان کی اطلاع نہیں ملی۔
عبادت گاہ کے مذہبی پیشوا اور متعدد یہودی تنظیموں نے اس واقعے پر تشویش کا اظہار کرتے ہوئے کہا ہے کہ یہ کوشش معاشرے کے لیے ایک واضح تنبیہ ہے کہ یہود دشمنی کے بڑھتے ہوئے رجحان کو زیادہ سنجیدگی سے لینے کی ضرورت ہے۔ ان کے مطابق مذہبی نفرت اور تعصب پر مبنی واقعات کے تدارک کے لیے مؤثر اقدامات ناگزیر ہیں۔
