اردوورلڈکینیڈا(ویب نیوز)پاکستانی حکومت کے سرمایہ کاری بورڈ کے ایڈیشنل سیکریٹری ذوالفقار علی کی سربراہی میں ایک اعلیٰ سطحی سرکاری وفد سرمایہ کاری کے تحفظ اور فروغ کے دوطرفہ معاہدے پر مذاکرات کے لیے کینیڈا کے دارالحکومت اوٹاوا کے دورے پر ہے۔
پاکستانی وفد میں تجارت، سرمایہ کاری اور معاشی امور سے متعلق مختلف اداروں کے سینئر حکام شامل ہیں، جو مجوزہ معاہدے کے مختلف پہلوؤں پر کینیڈین حکام کے ساتھ تبادلۂ خیال کر رہے ہیں۔
مذاکراتی اجلاس کے افتتاحی سیشن میں کینیڈا کے عالمی امور کے جنوبی ایشیا شعبے کے ڈائریکٹر جنرل ژاں کرسچین بریاں نے پاکستانی وفد کا خیرمقدم کرتے ہوئے تعمیری اور نتیجہ خیز مذاکرات کی امید ظاہر کی۔
اس موقع پر پاکستان کے ہائی کمشنر محمد سلیم نے دونوں ممالک کے اس عزم کو اجاگر کیا کہ وہ ایک معیاری اور مؤثر سرمایہ کاری نظام کے قیام کے لیے معاہدے کو حتمی شکل دینا چاہتے ہیں۔
ہائی کمشنر نے کہا کہ پاکستان نے کاروباری ماحول کو بہتر بنانے کے لیے متعدد اصلاحات متعارف کرائی ہیں۔ ان اقدامات میں سرمایہ کاروں کے حقوق کا تحفظ، تنازعات کی شفاف روک تھام کے طریقہ کار اور ضابطہ جاتی ہم آہنگی کو خصوصی اہمیت دی گئی ہے۔ انہوں نے بتایا کہ یہ اقدامات حکومت کے وسیع تر معاشی اصلاحاتی پروگرام کا حصہ ہیں، جن کا مقصد ملکی اور غیر ملکی سرمایہ کاری کو فروغ دینا اور معاشی ترقی کی رفتار کو تیز کرنا ہے۔
انہوں نے اس امید کا اظہار بھی کیا کہ جاری مذاکرات دونوں ممالک کے درمیان اقتصادی تعاون کو مزید مضبوط بنانے اور سرمایہ کاری کے نئے مواقع پیدا کرنے میں اہم کردار ادا کریں گے۔
