اردوورلڈکینیڈا(ویب نیوز)حکومتی ذرائع کے مطابق وفاقی حکومت نے پاکستان پیپلز پارٹی کو وفاقی کابینہ میں شمولیت کی باضابطہ دعوت دے دی ہے، جس کے بعد سیاسی حلقوں میں اہم تبدیلیوں کی بازگشت شروع ہو گئی ہے۔
ذرائع کا کہنا ہے کہ اگر پاکستان پیپلز پارٹی حکومت میں شمولیت پر رضامند ہو جاتی ہے تو پارٹی کے چیئرمین بلاول بھٹو زرداری کو کسی اہم وزارت کا قلمدان دیے جانے کا امکان ہے۔
اطلاعات کے مطابق بجٹ کی منظوری کے بعد وفاقی کابینہ میں بڑے پیمانے پر ردوبدل متوقع ہے، جس کے دوران متعدد نئے چہرے سامنے لائے جائیں گے اور کچھ موجودہ وزراء کے قلمدان بھی تبدیل کیے جا سکتے ہیں۔
ذرائع کے مطابق وزیراعظم نے تمام وفاقی وزراء سے ان کی کارکردگی رپورٹس طلب کر لی ہیں۔ ان رپورٹس کی بنیاد پر آئندہ مرحلے میں وزراء کے محکموں میں تبدیلی کا عمل شروع کیا جائے گا۔
جن وزارتوں میں تبدیلی کے امکانات ظاہر کیے جا رہے ہیں ان میں تجارت، توانائی، ہاؤسنگ، مواصلات، خزانہ اور خارجہ امور شامل ہیں۔
اس کے علاوہ یہ بھی بتایا جا رہا ہے کہ وزیراعظم کے کئی معاون خصوصی بھی ممکنہ تبدیلیوں کی زد میں آ سکتے ہیں، جس سے آئندہ دنوں میں حکومتی ٹیم کے ڈھانچے میں واضح تبدیلیوں کا امکان بڑھ گیا ہے۔
سیاسی مبصرین کے مطابق اگر پیپلز پارٹی حکومت میں شامل ہوتی ہے تو یہ وفاقی سطح پر ایک اہم سیاسی پیش رفت ہو گی، جو نہ صرف حکومتی اتحاد کو مضبوط بنا سکتی ہے بلکہ پالیسی سازی پر بھی اثر انداز ہو سکتی ہے۔
