اردوورلڈکینیڈا(ویب نیوز)کینیڈا کے شہر وینکوور اور اس کے گردونواح میں بس سروس فراہم کرنے والی ٹرانس لنک کی ذیلی کمپنی کوسٹ ماؤنٹین بس کمپنی اور تقریباً پانچ ہزار ٹرانزٹ ملازمین کی نمائندگی کرنے والی یونینز کے درمیان ایک عبوری معاہدہ طے پا گیا ہے، جس کے بعد ممکنہ ہڑتال کا خطرہ ٹل گیا ہے۔
یونینز میں بس ڈرائیورز، سی بس آپریٹرز، مینٹیننس اور سروس ورکرز شامل ہیں۔ کوسٹ ماؤنٹین بس کمپنی ٹرانس لنک کی سب سے بڑی آپریٹنگ کمپنی ہے، جو وینکوور اور اس کے ملحقہ علاقوں میں بس سروس کی ذمہ دار ہے۔
گزشتہ ماہ بس ڈرائیورز اور سی بس آپریٹرز نے بھاری اکثریت سے ہڑتال کے حق میں ووٹ دیا تھا، تاہم نئے عبوری معاہدے کے بعد فوری طور پر کسی بھی قسم کی ہڑتال کا امکان ختم ہو گیا ہے۔
یونینز، یونیفور لوکل 111 اور 2200 نے پیر کے روز جاری بیان میں کہا کہ معاہدے میں ملازمین کی تنخواہوں میں اضافہ، بہتر کام کے حالات اور اضافی مراعات شامل ہیں۔
فریقین کے درمیان مذاکرات کی ثالثی ٹریور سونز نے کی۔تاہم یہ معاہدہ ابھی حتمی نہیں ہے اور اسے نافذ ہونے سے قبل دونوں فریقوں کی منظوری درکار ہوگی۔
یونیفور لوکل 111 کے صدر مائیک میک ملن نے کہا، "یہ معاہدہ ملازمین کے لیے مثبت نتائج لایا ہے اور ہم چاہتے ہیں کہ ہمارے ارکان اس کا جائزہ لیں اور پھر اس پر اپنا فیصلہ دیں۔”
عبوری معاہدے کی تفصیلات فی الحال ظاہر نہیں کی گئیں۔ یونینز کا کہنا ہے کہ ارکان کی منظوری کے بعد ہی اس کی تفصیلات جاری کی جائیں گی۔نئے معاہدے کے لیے مذاکرات فروری میں شروع ہوئے تھے، جبکہ سابقہ معاہدہ مارچ کے اختتام پر ختم ہو گیا تھا۔
یونینز نے مئی میں ہڑتال کے حق میں ووٹنگ کے وقت الزام عائد کیا تھا کہ کمپنی نے اپنے مؤقف کو مزید سخت کر لیا ہے اور وہ اپنی رعایتی شرائط واپس لینے سے انکار کر رہی ہے۔تقریباً پانچ ہزار ٹرانزٹ ملازمین میں سے 99 فیصد نے ہڑتال کے حق میں ووٹ دیا تھا، بشرطیکہ مذاکرات میں پیش رفت نہ ہوتی۔
ممکنہ ہڑتال سے وینکوور میں جاری فیفا ورلڈ کپ کی میزبانی کی سرگرمیاں بھی متاثر ہو سکتی تھیں، کیونکہ ان دنوں بی سی پلیس، پی این ای اور دیگر مقامات تک آنے جانے کے لیے عوامی ٹرانسپورٹ استعمال کرنے والوں کی تعداد میں نمایاں اضافہ دیکھا جا رہا ہے۔
ٹرانس لنک کے مطابق 18 جون کو، جب وینکوور میں ٹیم کینیڈا کا مقابلہ قطر سے ہوا، اس روز ٹرانزٹ سسٹم استعمال کرنے والوں کی تعداد ایک عام جمعرات کے مقابلے میں 18 فیصد زیادہ ریکارڈ کی گئی
