اردو ورلڈ کینیڈا ( ویب نیوز ) کینیڈا کے قانون نافذ کرنے والے اداروں کو ایک اہم کامیابی اس وقت حاصل ہوئی جب ملک کے انتہائی مطلوب مفرور ایل بوئیون (36 سال) کو اسپین کے ساحلی شہر ماربیلا سے گرفتار کر لیا گیا۔
ملزم فروری 2023 سے مفرور تھا اور اس کی گرفتاری کے لیے کینیڈین حکام نے ایک لاکھ کینیڈین ڈالر تک انعام کا اعلان بھی کر رکھا تھا۔کیوبیک پولیس کے مطابق وہ اسپین اور دیگر یورپی حکام کے ساتھ مسلسل رابطے میں ہے تاکہ گرفتاری کی باضابطہ تصدیق اور آئندہ قانونی کارروائی سے متعلق تمام مراحل مکمل کیے جا سکیں۔ حکام کا کہنا ہے کہ اس کیس کی تحقیقات جاری ہیں اور مزید تفصیلات مناسب وقت پر جاری کی جائیں گی۔
پولیس کے مطابق ایل بوئیون کو منشیات کی اسمگلنگ، منظم جرائم میں ملوث ہونے، اغوا، غیر قانونی حراست، ہتھیاروں کی اسمگلنگ، سنگین حملوں اور گھروں پر مسلح حملوں سمیت متعدد سنگین جرائم کے مقدمات میں مطلوب قرار دیا گیا تھا۔ تفتیشی اداروں کا یہ بھی کہنا ہے کہ اس کا تعلق کیوبیک میں سرگرم موٹر سائیکل گینگز کے درمیان ہونے والی پرتشدد جھڑپوں سے بھی رہا ہے، جنہوں نے گزشتہ برسوں میں صوبے کی امن و امان کی صورتحال کو متاثر کیا۔
کیوبیک کے وزیر برائے پبلک سیکیورٹی ایان لافرینیئر نے اس کامیاب کارروائی پر کیوبیک پولیس، رائل کینیڈین ماؤنٹڈ پولیس (RCMP) اور انٹرپول کی مشترکہ کوششوں کو سراہتے ہوئے کہا کہ بین الاقوامی تعاون کے ذریعے خطرناک ملزمان کو قانون کے کٹہرے میں لانا حکومت کی اولین ترجیح ہے۔
یاد رہے کہ ایل بوئیون کی گرفتاری کے لیے عوام سے معلومات حاصل کرنے کی غرض سے 100 ہزار کینیڈین ڈالر تک انعام مقرر کیا گیا تھا۔ اس کی گرفتاری کو کینیڈا اور یورپی قانون نافذ کرنے والے اداروں کے درمیان مؤثر تعاون کی ایک اہم مثال قرار دیا جا رہا ہے۔دوسری جانب ہسپانوی اور دیگر یورپی حکام نے تاحال گرفتاری کی کارروائی، ملزم کی حوالگی یا ممکنہ قانونی کارروائی کے حوالے سے مزید تفصیلات جاری نہیں کی ہیں، تاہم توقع کی جا رہی ہے کہ قانونی تقاضے مکمل ہونے کے بعد اسے کینیڈا منتقل کرنے کے لیے حوالگی کی کارروائی شروع کی جا سکتی ہے۔
