اردوورلڈکینیڈا(ویب نیوز)مونٹریال میں بدھ سے ہفتے تک شدید گرمی کی لہر کے پیش نظر ییلو ہیٹ وارننگ جاری کر دی گئی ہے، جبکہ حکام نے شہریوں کو احتیاطی تدابیر اختیار کرنے کی ہدایت کی ہے۔ یہ وارننگ ایسے وقت میں سامنے آئی ہے جب یکم جولائی کو کینیڈا ڈے کے ساتھ ہزاروں شہری گھروں کی منتقلی (موونگ ڈے) بھی کر رہے ہیں۔
محکمہ انوائرمنٹ اینڈ کلائمیٹ چینج کینیڈا (ECCC) کے مطابق دن کے وقت درجہ حرارت 30 سے 33 ڈگری سینٹی گریڈ تک پہنچنے کا امکان ہے، جبکہ رات کا کم سے کم درجہ حرارت تقریباً 20 ڈگری سینٹی گریڈ رہے گا، جس کے باعث گھروں اور عمارتوں کو ٹھنڈا ہونے کا مناسب موقع نہیں ملے گا۔
محکمہ موسمیات نے خبردار کیا ہے کہ زیادہ نمی کے باعث ہیومیڈیکس 40 سے 44 ڈگری سینٹی گریڈ تک محسوس ہو سکتا ہے، جس سے گرمی کی شدت انسانی صحت کے لیے خطرناک ثابت ہو سکتی ہے۔
مونٹریال پبلک ہیلتھ کے ڈپٹی میڈیکل ڈائریکٹر ڈیوڈ کائزر نے شہریوں، خصوصاً گھروں کی منتقلی کرنے والوں اور کھلے آسمان تلے کام کرنے والے افراد کو خصوصی احتیاط کی تلقین کی ہے۔
انہوں نے کہا کہ جو لوگ سامان اٹھانے یا سخت جسمانی مشقت کرنے والے ہیں، ان کے لیے یہ دن معمول سے کہیں زیادہ دشوار ہوگا، اس لیے بہتر ہے کہ وہ صبح سویرے یا شام کے اوقات میں کام کریں تاکہ دن کے گرم ترین حصے میں دھوپ سے بچا جا سکے۔ انہوں نے یہ بھی مشورہ دیا کہ کام کے دوران وقفے وقفے سے آرام کریں اور جسم میں پانی کی کمی نہ ہونے دیں۔
دوسری جانب ڈیون شائر پارک میں موجود شہری بھی گرمی کی شدت سے پریشان دکھائی دیے۔ نادین شیون لوف نے بتایا کہ بچوں کو ٹھنڈا رکھنا مشکل ہو گیا ہے، اسی لیے وہ انہیں مسلسل پانی، لیمونیڈ اور دیگر مشروبات پلاتے رہتے ہیں تاکہ گرمی کے اثرات سے محفوظ رکھا جا سکے۔
ڈیوڈ کائزر کے مطابق موجودہ پیش گوئی کے تحت مونٹریال شہر کے ہنگامی گرمی کے منصوبے کی بلند ترین سطح نافذ نہیں کی جا رہی، کیونکہ اس کے لیے مسلسل تین دن تک درجہ حرارت 33 ڈگری سینٹی گریڈ یا اس سے زیادہ رہنے کی پیش گوئی ضروری ہوتی ہے۔
تاہم حکام نے موسم گرما کے آغاز ہی میں طویل دورانیے کی گرمی، کینیڈا ڈے اور موونگ ڈے کے باعث احتیاطی اقدامات تیز کر دیے ہیں۔ اس سلسلے میں شہر کے مخصوص علاقوں اور عمارتوں میں گھر گھر جا کر ایسے افراد کی نشاندہی کی جائے گی جو اکیلے رہتے ہیں یا گرمی کے دوران طبی امداد اور مدد کے محتاج ہو سکتے ہیں۔
