اردوورلڈکینیڈا(ویب نیوز)کیلگری میں موسلادھار بارش کے پیش نظر محکمہ ماحولیات نے شدید بارش کی وارننگ جاری کرتے ہوئے شہریوں کو احتیاط برتنے کی ہدایت کی ہے۔
محکمے کے مطابق شہر میں 50 سے 100 ملی میٹر تک بارش ہونے کا امکان ہے، جو پیر تک جاری رہ سکتی ہے۔ توقع ہے کہ پیر کی شام بارش کی شدت میں کمی آئے گی اور منگل کی صبح تک بارش کا سلسلہ ختم ہو جائے گا۔
ماہرین موسمیات نے خبردار کیا ہے کہ نشیبی علاقوں میں سڑکوں پر پانی جمع ہو سکتا ہے، جبکہ تیز بہاؤ گاڑیوں کو بہا لے جانے اور بنیادی ڈھانچے کو نقصان پہنچانے کا سبب بن سکتا ہے۔
شہریوں کو ہدایت کی گئی ہے کہ زیرِ آب سڑکوں پر گاڑی چلانے سے گریز کریں اور دریاؤں، ندی نالوں اور آبی گزرگاہوں کے قریب ممکنہ کٹاؤ اور سڑکوں کی خرابی سے محتاط رہیں۔
دوسری جانب، کیلگری کے میئر جیرومی فرکاس نے بتایا کہ اس وقت دریاؤں میں پانی کی سطح معمول کے مطابق ہے، تاہم ہفتے کے آغاز میں اس میں معمولی اضافہ متوقع ہے۔
انہوں نے کہا کہ رہائشی علاقوں میں دریاؤں کے کناروں سے پانی باہر آنے کا خدشہ نہیں ہے۔
میئر کے مطابق موجودہ بارش کی صورتحال جون کے اوائل میں ہونے والی بارش سے ملتی جلتی ہو سکتی ہے، جس کے نتیجے میں دریاؤں کے قریب نشیبی علاقے زیرِ آب آ سکتے ہیں، انڈر پاسز کے قریب پیدل چلنے کے راستے عارضی طور پر بند کیے جا سکتے ہیں، جبکہ کشتی رانی سے متعلق انتباہ بھی جاری کیا جا سکتا ہے۔
انہوں نے مزید بتایا کہ ضرورت پڑنے پر امدادی عملہ تیار ہے، تاہم فی الحال اضافی ہنگامی کارروائیوں کی توقع نہیں کی جا رہی۔
محکمہ موسمیات نے اتوار اور پیر دونوں روز گرج چمک کے ساتھ بارش کی پیش گوئی کی ہے، جبکہ درجہ حرارت 15 سے 17 ڈگری سینٹی گریڈ کے درمیان رہنے کا امکان ہے۔
