اردوورلڈکینیڈا(ویب نیوز)کینیڈا کے شہر کیلگری میں سالانہ کیلگری اسٹیمپیڈ کا باقاعدہ آغاز جمعہ کی صبح رنگا رنگ پریڈ سے ہوا، جسے دیکھنے کے لیے شہر کی مرکزی سڑکوں پر صبح سویرے ہی لاکھوں افراد جمع ہوگئے۔
اسٹیمپیڈ پریڈ کا آغاز 9 ایونیو اور تھرڈ اسٹریٹ جنوب مشرق (SE) سے کیا گیا، جہاں سے پریڈ شہر کے وسطی علاقے کی جانب روانہ ہوئی۔ پریڈ مغرب کی سمت بڑھتے ہوئے ڈاؤن ٹاؤن سے گزری اور بعد ازاں 6 ایونیو اور تھرڈ اسٹریٹ SE کی جانب واپس مڑی۔
منتظمین کے مطابق پریڈ کے راستے پر تقریباً 3 لاکھ 50 ہزار افراد نے شرکت کی۔ بہترین جگہ حاصل کرنے کے لیے شہری طلوعِ آفتاب سے پہلے ہی سڑکوں کے کنارے پہنچنا شروع ہوگئے تھے، جبکہ بعض افراد صبح 5:30 بجے ہی اپنی نشستیں سنبھال چکے تھے۔
پریڈ میں شریک متعدد افراد نے سٹی نیوز سے گفتگو کرتے ہوئے بتایا کہ کیلگری اسٹیمپیڈ پریڈ میں شرکت ان کے خاندان کی برسوں پرانی روایت ہے، جسے وہ ہر سال جوش و خروش سے مناتے ہیں۔
دوسری جانب کچھ ایسے افراد بھی پریڈ میں شریک ہوئے جو پہلی مرتبہ اس تاریخی تقریب کا حصہ بنے۔ ان میں بیرونِ ملک سے آنے والے سیاح بھی شامل تھے، جنہوں نے اس منفرد ثقافتی اور روایتی تقریب کو اپنی زندگی کا یادگار تجربہ قرار دیا۔
واضح رہے کہ کیلگری اسٹیمپیڈ کینیڈا کی سب سے بڑی ثقافتی تقریبات میں شمار ہوتا ہے، جو 10 روز تک جاری رہتا ہے۔ اس دوران روڈیو مقابلے، موسیقی کی محافل، ثقافتی سرگرمیاں، تفریحی پروگرام اور خاندانی تقریبات منعقد کی جاتی ہیں، جن میں ہر سال لاکھوں مقامی اور غیر ملکی سیاح شرکت کرتے ہیں۔
