اردو ورلڈ کینیڈا ( ویب نیوز ) کینیڈا کے شہر سرے میں پولیس نے جعلی برانڈڈ اشیاء کی مبینہ خرید و فروخت کے خلاف ایک بڑی کارروائی کرتے ہوئے 66 لاکھ ڈالر سے زائد مالیت کا مشتبہ سامان ضبط کر لیا۔
کارروائی ایک سال تک جاری رہنے والی خصوصی تحقیقات کے بعد عمل میں آئی، جبکہ اس سلسلے میں ایک مشتبہ شخص کو گرفتار بھی کیا گیا، جسے بعد ازاں قانونی کارروائی کے بعد رہا کر دیا گیا۔ تاہم پولیس کا کہنا ہے کہ کیس کی تحقیقات بدستور جاری ہیں۔پولیس کے مطابق یہ کارروائی "پروجیکٹ پراڈا” کے تحت کی گئی، جس کا آغاز جون 2025 میں اس وقت ہوا جب کینیڈین اینٹی کاؤنٹرفیٹنگ نیٹ ورک کی جانب سے سرے میں مبینہ طور پر جعلی برانڈڈ کپڑوں اور دیگر قیمتی اشیاء کی فروخت سے متعلق معلومات فراہم کی گئیں۔
اطلاع ملنے کے بعد سرے پولیس کے پرولیفک کرائم یونٹ نے معاملے کی باقاعدہ تحقیقات شروع کیں اور مختلف شواہد اکٹھے کیے۔تحقیقات کے دوران پولیس اس نتیجے پر پہنچی کہ مشتبہ جعلی برانڈڈ سامان شہر کے ایک رہائشی مکان سے فروخت کیا جا رہا تھا۔ اس کے بعد 17 جون کو عدالت سے حاصل کردہ سرچ وارنٹ پر عمل کرتے ہوئے مذکورہ مقام پر چھاپہ مارا گیا، جہاں سے بڑی مقدار میں مختلف عالمی برانڈز سے منسوب اشیاء برآمد کر لی گئیں۔
پولیس کے مطابق ضبط کیے گئے سامان میں 19 رولیکس گھڑیاں، 1,758 نائکی جرسیاں، 536 ایڈیڈاس جرسیاں، 131 سی سی ایم این ایچ ایل جرسیاں، 375 مچل اینڈ نیس کی جرسیاں اور ٹوپیاں، ہرمیس کے زیورات اور جوتے، لوئس ووٹن کے بیگز اور جوتے، کرسچن ڈائر کے کپڑے، بیگز، زیورات اور جوتے، بربیری کے ملبوسات، باتھنگ ایپ کے کپڑے اور کرٹئیر کی گھڑیاں، عینکیں اور زیورات سمیت متعدد دیگر اشیاء شامل ہیں۔
سرے پولیس کا کہنا ہے کہ ابتدائی تحقیقات کے مطابق برآمد ہونے والا سامان مشتبہ طور پر جعلی برانڈڈ مصنوعات پر مشتمل ہے، تاہم اس کی حتمی قانونی حیثیت کا تعین مزید تفتیش اور متعلقہ قانونی کارروائی کے بعد کیا جائے گا۔پولیس نے عوام کو بھی متنبہ کیا ہے کہ غیر مصدقہ ذرائع سے مہنگے برانڈز کی اشیاء خریدنے سے گریز کریں، کیونکہ جعلی مصنوعات نہ صرف صارفین کو مالی نقصان پہنچاتی ہیں بلکہ اصل برانڈز کے حقوق اور قانونی کاروبار کو بھی متاثر کرتی ہیں۔ حکام کے مطابق اس معاملے کی مزید تحقیقات جاری ہیں اور ضرورت پڑنے پر مزید قانونی کارروائی بھی عمل میں لائی جا سکتی ہے۔
