اردوورلڈکینیڈا(ویب نیوز)کینیڈا کے محکمہ ماحولیات و موسمیاتی تبدیلی (ECCC) نے گریٹر مونٹریال کے علاقے کے لیے شدید گرج چمک والے طوفان کا ییلو واچ جاری کر دیا ہے، جبکہ ایسٹرن ٹاؤن شپس کے لیے ٹورنیڈو واچ بھی نافذ کر دی گئی ہے۔
محکمہ موسمیات کے مطابق منگل کی دوپہر اور شام کے دوران ایسے طوفان آنے کا امکان ہے جو 100 سے 110 کلومیٹر فی گھنٹہ تک تیز ہوائیں، بڑے اولے اور موسلا دھار بارش لا سکتے ہیں۔
محکمہ موسمیات کی ماہر کیٹ لیکلرک نے بتایا کہ تیز ہواؤں کے باعث درخت اور بجلی کی لائنیں گر سکتی ہیں، جس سے مختلف علاقوں میں بجلی کی بندش کا خدشہ ہے۔
انہوں نے کہا کہ اگرچہ طوفانی بادل تیزی سے حرکت کر رہے ہیں، تاہم وہ مختصر وقت میں بہت زیادہ بارش برسائیں گے۔ منگل کی صبح ایسٹرن ٹاؤن شپس میں ہونے والے طوفانوں کے بعد بعض علاقوں میں معمولی سیلاب بھی رپورٹ ہوا ہے۔
شہریوں کو احتیاط کی ہدایت
ماہرین نے خبردار کیا ہے کہ گرج چمک کے دوران جھیلوں، دریاؤں اور دیگر آبی مقامات پر موجود رہنا خطرناک ثابت ہو سکتا ہے۔ بجلی کڑکنے اور گرج چمک کے دوران فوری طور پر کسی محفوظ عمارت کے اندر پناہ لینے کی ہدایت کی گئی ہے کیونکہ آسمانی بجلی جان لیوا ہو سکتی ہے۔
ادھر ہائیڈرو کیوبیک نے بھی خبردار کیا ہے کہ شدید موسم کے باعث بجلی کی فراہمی متاثر ہو سکتی ہے۔
ادارے کے ترجمان جوناتھن پیٹی نے شہریوں سے اپیل کی کہ وہ ہنگامی صورتحال کے لیے پینے کا پانی، دیرپا خوراک، ٹارچ، اضافی بیٹریاں، کمبل اور ضروری ادویات پر مشتمل ایمرجنسی کٹ تیار رکھیں۔ انہوں نے مشورہ دیا کہ بجلی بحال ہونے کے بعد برقی آلات کو وولٹیج کے اضافے سے بچانے کے لیے سرج پروٹیکٹر استعمال کیا جائے۔
حکام نے یہ بھی خبردار کیا کہ باربی کیو، کیمپنگ اسٹوو یا پٹرول سے چلنے والے جنریٹر، جو صرف کھلی جگہوں پر استعمال کے لیے بنائے گئے ہیں، انہیں بجلی بند ہونے کی صورت میں بھی گھر کے اندر ہرگز استعمال نہ کیا جائے کیونکہ ان سے خارج ہونے والی کاربن مونو آکسائیڈ گیس جان لیوا ثابت ہو سکتی ہے۔
صوبے کے بیشتر علاقوں میں الرٹس
کیٹ لیکلرک کے مطابق کیوبیک کے بیشتر حصے مختلف نوعیت کے گرج چمک کے الرٹس کی زد میں ہیں، جبکہ کیوبیک سٹی اور ٹروا ریویرز کے بعض علاقوں میں شدید طوفان کی وارننگ جاری کی گئی ہے، جو زیادہ محدود علاقوں اور فوری خطرے کے پیش نظر جاری کی جاتی ہے۔
آئندہ دنوں کی پیش گوئی
منگل کو دھوپ اور بادلوں کا ملا جلا موسم رہے گا، صبح کے وقت 50 کلومیٹر فی گھنٹہ کی رفتار سے ہوائیں چلنے کا امکان ہے جبکہ سہ پہر کے بعد 40 فیصد بارش اور گرج چمک کا امکان ہے۔ درجہ حرارت 33 ڈگری سینٹی گریڈ تک پہنچ سکتا ہے جبکہ نمی کے باعث محسوس ہونے والا درجہ حرارت 42 ڈگری تک جا سکتا ہے۔ الٹرا وائلٹ شعاعوں کی شدت بھی بہت زیادہ رہے گی۔ رات کا کم سے کم درجہ حرارت 20 ڈگری سینٹی گریڈ رہنے کی توقع ہے۔مونٹ
شام کے وقت شدید گرج چمک کے طوفان کا امکان ہے، تاہم بارش اور طوفانی سرگرمی آدھی رات کے قریب ختم ہونے کی توقع ہے۔
بدھ کو موسم صاف اور دھوپ والا رہے گا۔ زیادہ سے زیادہ درجہ حرارت 29 ڈگری جبکہ نمی کے باعث محسوس ہونے والا درجہ حرارت 33 ڈگری سینٹی گریڈ رہے گا۔ رات کو آسمان صاف رہے گا اور کم سے کم درجہ حرارت 19 ڈگری سینٹی گریڈ ہوگا۔
جمعرات کو دوبارہ مرطوب موسم لوٹ آئے گا۔ دھوپ اور بادلوں کے ساتھ 60 فیصد بارش کا امکان ہے، زیادہ سے زیادہ درجہ حرارت 26 ڈگری سینٹی گریڈ رہے گا، جبکہ رات تک بادل چھٹ جائیں گے اور کم سے کم درجہ حرارت 16 ڈگری سینٹی گریڈ ہوگا۔
جمعہ کو موسم دھوپ والا رہے گا، زیادہ سے زیادہ درجہ حرارت 26 اور کم سے کم 19 ڈگری سینٹی گریڈ رہنے کی پیش گوئی کی گئی ہے۔
