اردوورلڈکینیڈا(ویب نیوز)اسلام آباد کی ڈسٹرکٹ اینڈ سیشن کورٹس نے 26 نومبر کے احتجاج سے متعلق مقدمے میں پاکستان تحریکِ انصاف (پی ٹی آئی) کے رہنما اور قومی اسمبلی میں قائدِ حزبِ اختلاف عمر ایوب کو اشتہاری قرار دیتے ہوئے ان کے دائمی وارنٹِ گرفتاری جاری کر دیے۔
کیس کی سماعت جوڈیشل مجسٹریٹ شائستہ کنڈی نے کی، جہاں عدالت کی جانب سے متعدد بار طلب کیے جانے کے باوجود عمر ایوب پیش نہ ہوئے۔ مسلسل عدم حاضری پر عدالت نے انہیں اشتہاری قرار دیتے ہوئے دائمی وارنٹِ گرفتاری جاری کرنے کا حکم دے دیا۔
عدالت نے قرار دیا کہ ملزم کو بارہا طلبی کے باوجود پیش نہیں کیا گیا، جس کے باعث قانونی کارروائی کے تحت انہیں اشتہاری قرار دینا ضروری ہو گیا۔
عمر ایوب کے خلاف اسلام آباد کے تھانہ سیکرٹریٹ میں 26 نومبر کے احتجاج کے دوران دفعہ 144 کی خلاف ورزی سمیت دیگر دفعات کے تحت مقدمہ درج ہے۔ مقدمے میں الزام عائد کیا گیا ہے کہ احتجاج کے دوران حکومتی پابندیوں کی خلاف ورزی کی گئی اور قانون نافذ کرنے والے اداروں کی کارروائی میں رکاوٹ ڈالی گئی۔
عدالت کے فیصلے کے بعد قانون نافذ کرنے والے ادارے عمر ایوب کی گرفتاری کے لیے کارروائی کر سکیں گے تاکہ انہیں عدالت کے روبرو پیش کیا جا سکے اور مقدمے کی مزید سماعت آگے بڑھائی جا سکے۔
واضح رہے کہ 26 نومبر کے احتجاج سے متعلق مختلف مقدمات میں پی ٹی آئی کے متعدد رہنماؤں اور کارکنوں کے خلاف قانونی کارروائیاں جاری ہیں، جبکہ ان مقدمات کی سماعت اسلام آباد کی مختلف عدالتوں میں جاری ہے۔
