اردو ورلڈ کینیڈا ( ویب نیوز ) پاکستان کرکٹ بورڈ (پی سی بی) نے ڈومیسٹک کرکٹ سیزن 2026-27 کے باقاعدہ شیڈول کا اعلان کر دیا ہے، جس کے تحت نئے سیزن کا آغاز 11 اگست سے ملتان میں ہوگا۔
پی سی بی کا کہنا ہے کہ اس مرتبہ سیزن کی منصوبہ بندی آئندہ آئی سی سی کرکٹ ورلڈ کپ 2027 کی تیاریوں کو مدنظر رکھتے ہوئے کی گئی ہے تاکہ قومی ٹیم کے لیے باصلاحیت کھلاڑیوں کی تیاری اور انہیں زیادہ سے زیادہ میچ پریکٹس فراہم کی جا سکے۔
پی سی بی کی جانب سے جاری کردہ شیڈول کے مطابق سیزن کے آغاز میں نیشنل چیمپیئنز کپ (لسٹ اے) اور ڈیپارٹمنٹل ون ڈے کپ کا انعقاد کیا جائے گا۔
بورڈ حکام کے مطابق سیزن کا آغاز ون ڈے فارمیٹ سے کرنے کا مقصد قومی ٹیم کے ممکنہ کھلاڑیوں کو 50 اوورز کی کرکٹ میں زیادہ مواقع فراہم کرنا ہے، تاکہ وہ عالمی کپ کی تیاری بہتر انداز میں کر سکیں۔
قائداعظم ٹرافی اور پریذیڈنٹ ٹرافی کا شیڈول جاری
ریڈ بال کرکٹ کے تحت اس سیزن میں قائداعظم ٹرافی گولڈ اور قائداعظم ٹرافی سلور کے ساتھ پریذیڈنٹ ٹرافی گریڈ ون، گریڈ ٹو گولڈ اور گریڈ ٹو سلور کا بھی انعقاد کیا جائے گا۔
یہ بھی پڑھیں
آئی سی سی اور پی سی بی کا طویل اجلاس ،کیا پاکستان بھارت کیخلاف میچ کھیلے گا ؟
پی سی بی کے مطابق پریذیڈنٹ ٹرافی گریڈ ون، گریڈ ٹو گولڈ اور گریڈ ٹو سلور کے مقابلے 12 ستمبر سے شروع ہوں گے جبکہ قائداعظم ٹرافی گولڈ اور سلور کا آغاز یکم نومبر سے ہوگا۔
قائداعظم ٹرافی گولڈ میں آٹھ جبکہ سلور ڈویژن میں بارہ ٹیمیں حصہ لیں گی۔ دونوں ڈویژنز کو فرسٹ کلاس درجہ حاصل ہوگا اور سیزن کے اختتام پر ایک ٹیم کی پروموشن اور ایک ٹیم کی ریلیگیشن ہوگی، جس سے ٹیموں کے درمیان سخت مقابلے کی توقع کی جا رہی ہے۔
ریجنل ٹیموں کی تعداد میں اضافہ
پی سی بی نے ڈومیسٹک کرکٹ کے ڈھانچے کو مزید مضبوط بنانے کے لیے اہم فیصلہ کرتے ہوئے 16 ریجنز کی 18 ٹیموں کی تعداد بڑھا کر 20 ٹیمیں کر دی ہے۔
نئے فیصلے کے تحت سیالکوٹ اور پشاور ریجنز کو بھی لاہور اور کراچی کی طرح دو، دو ریجنل ٹیمیں دی گئی ہیں۔ بورڈ کا کہنا ہے کہ اس اقدام سے زیادہ کھلاڑیوں کو اعلیٰ سطح پر کھیلنے کے مواقع ملیں گے اور علاقائی سطح پر مسابقت میں بھی اضافہ ہوگا۔
نیشنل ٹی ٹوئنٹی کپ اور جونیئر ایونٹس
شیڈول کے مطابق نیشنل ٹی ٹوئنٹی کپ گولڈ اور سلور کے مقابلے 5 فروری سے 6 مارچ تک لاہور میں کھیلے جائیں گے جہاں ملک بھر کی بہترین ٹیمیں ایک دوسرے کے مدمقابل ہوں گی۔
پی سی بی نے نوجوان کھلاڑیوں کی صلاحیتوں کو نکھارنے کے لیے بھی متعدد ایونٹس کا اعلان کیا ہے۔ نیشنل انڈر 19 کپ اور نیشنل انڈر 19 چیمپیئن شپ 22 اکتوبر سے 5 دسمبر تک جاری رہے گی جبکہ انڈر 15 ون ڈے کپ اکتوبر اور نومبر میں منعقد ہوگا۔ اسی طرح انڈر 17 ٹو ڈے ٹورنامنٹ نومبر اور دسمبر میں کھیلا جائے گا۔
اس کے علاوہ ڈسٹرکٹ چیلنج لیگز، انٹر ڈسٹرکٹ انڈر 19 اور انٹر ڈسٹرکٹ سینئر ٹورنامنٹس بھی معمول کے مطابق شیڈول کا حصہ ہوں گے۔
ورلڈ کپ 2027 کی تیاری اولین ترجیح
پی سی بی کے سینئر جنرل منیجر ڈومیسٹک کرکٹ اسامہ شارون نے کہا کہ ڈومیسٹک سیزن 2026-27 کھلاڑیوں اور شائقین دونوں کے لیے یادگار ثابت ہوگا۔ ان کے مطابق بورڈ نے ریجنل کرکٹ کو مضبوط بنانے اور ڈومیسٹک نظام میں بہتری کے لیے خصوصی توجہ دی ہے۔
مزید پڑھیں
آئی سی سی اور پی سی بی کا طویل اجلاس ،کیا پاکستان بھارت کیخلاف میچ کھیلے گا ؟
انہوں نے کہا کہ ورلڈ کپ 2027 کی تیاری پی سی بی کی اہم ترجیح ہے، اسی لیے سیزن کا آغاز دو بڑے ون ڈے ٹورنامنٹس سے کیا جا رہا ہے تاکہ قومی ٹیم کے ممکنہ کھلاڑی زیادہ سے زیادہ 50 اوورز کے میچ کھیل سکیں۔
نوجوان کرکٹرز کی ترقی پر خصوصی توجہ
اسامہ شارون کا کہنا تھا کہ ڈیپارٹمنٹل کرکٹ نوجوان کھلاڑیوں کی ترقی میں اہم کردار ادا کرتی ہے اور انہیں اعلیٰ سطح پر اپنی صلاحیتیں دکھانے کے مواقع فراہم کرتی ہے۔
انہوں نے مزید بتایا کہ اس سیزن میں انڈر 19 کرکٹرز کو ریڈ بال کرکٹ کھیلنے کے بھی زیادہ مواقع دیے جائیں گے، جس سے ان کی تکنیکی مہارت، برداشت اور کھیل کی سمجھ میں اضافہ ہوگا۔ ان کے مطابق یہی نوجوان کھلاڑی مستقبل میں پاکستان کرکٹ کی بنیاد ثابت ہوں گے اور عالمی سطح پر قومی ٹیم کی نمائندگی کے لیے بہتر انداز میں تیار ہو سکیں گے۔
