اردو ورلڈ کینیڈا (ویب نیوز)بندپاور پلانٹس فوری بحال کئے جائیں،وزیر اعظم کا حکم وزیراعظم نے بجلی بحران کے خاتمے کے لیے بند پاور پلانٹس کی فوری بحالی اور بجلی کی لوڈشیڈنگ کی وجوہات واضح کرنے کی ہدایت کی۔
تفصیلات کے مطابق لاہور میں وزیراعظم شہباز شریف کی زیر صدارت ملک میں لوڈشیڈنگ کے حوالے سے اہم اجلاس ہوا۔ اجلاس میں وزیر منصوبہ بندی احسن اقبال، وزیر مملکت برائے پیٹرولیم مصدق ملک، وزیر خزانہ مفتاح اسماعیل، وزیر توانائی انجینئر خرم دستگیر، وزیر اطلاعات مریم اورنگزیب، رکن قومی اسمبلی شاہد خاقان عباسی اور وزیراعظم کے معاون خصوصی نے شرکت کی۔ وزیر برائے عوامی پالیسی اور اسٹریٹجک کمیونیکیشن فہد حسین نے ویڈیو لنک کے ذریعے اجلاس میں شرکت کی۔
اجلاس میں توانائی سے متعلق اعلی سرکاری حکام نے بھی شرکت کی۔ ملک میں جاری بجلی کے بحران پر تبادلہ خیال کیا گیا جس میں وزیراعظم نے بند پاور پلانٹس کو فوری بحال کرنے کا حکم دیا۔
وزیراعظم شہباز شریف نے ہدایت کی کہ لوڈشیڈنگ سے متعلق رپورٹ فوری پیش کی جائے جس میں لوڈشیڈنگ کی وجوہات واضح کی جائیں۔
وزیراعظم نے مزید ہدایت کی کہ صوبوں کو پینے کے پانی اور زرعی سہولیات کی فراہمی سے متعلق مسائل کو ترجیحی بنیادوں پر حل کیا جائے اور اس سلسلے میں ارسا صوبوں کی مشاورت اور آزادی سے فیصلے کرے۔
