وفاقی حکومت گرانا کوئی مسئلہ نہیں، تحریک انصاف کے رہنما فواد چوہدری نے کہا ہے کہ وفاقی حکومت گرانا کوئی مسئلہ نہیں کیونکہ اس وقت وفاق وینٹی لیٹر پر ہے، ہم جب چاہیں اس کا سوئچ کھینچ سکتے ہیں۔
اسلام آباد میں میڈیا سے گفتگو کرتے ہوئے فواد چوہدری کا کہنا تھا کہ رانا ثنا اللہ کو آگاہ ہونا چاہیے، سپریم کورٹ کے ججز نے عمران خان کو گھر بھیجا، ہمارے بھی بہت سے تحفظات ہیں، لیکن یہ عدالت کا فیصلہ ہے جسے ماننا ہوگا۔
پی ٹی آئی رہنما نے کہا کہ ن لیگ چھوٹی چھوٹی حرکتوں پر اتر آئی ہے، کل سرکاری ٹی وی پر پرویز الہی کا حلف نہیں دکھایا گیا۔ انہوں نے واضح کیا کہ موجودہ الیکشن کمیشن سے شفاف الیکشن ممکن نہیں۔
فواد چوہدری کا کہنا تھا کہ پہلے نئے اسپیکر اور ڈپٹی اسپیکر کا نام فائنل کیا جائے گا، اس کے بعد پنجاب کابینہ حلف اٹھائے گی۔ پرویز الہی اور عمران خان کی کچھ دیر قبل ملاقات ہوئی تھی، عمران خان کل لاہور جائیں گے۔
