اردو ورلڈ کینیڈا ( ویب نیوز )اسلام آباد ہائی کورٹ نے توہین عدالت کیس میں پاکستان تحریک انصاف کے چیئرمین عمران خان کو 31 اگست کو طلب کر لیا۔
جسٹس محسن اختر کیانی کی سربراہی میں اسلام آباد ہائی کورٹ کے لارجر بینچ نے پی ٹی آئی کے جلسے کے دوران ایڈیشنل سیشن جج کو نشانہ بنانے کے بیان پر پی ٹی آئی چیئرمین کے خلاف کارروائی شروع کی۔
ایڈووکیٹ جنرل اسلام آباد جہانگیر جدون عدالت میں پیش ہوئے اور دلائل دیتے ہوئے کہا کہ عمران خان نے عوامی اجتماع میں جج کا نام لے کر دھمکی دی ہے۔
عدالت نے سابق وزیراعظم کے قابل اعتراض ریمارکس کو پورے ملک کی عدلیہ کو بدنام کرنے کی کوشش قرار دیا۔
اس حوالے سے جسٹس محسن اختر کیانی نے کہا کہ لوگوں کا عدالتوں پر اعتماد ہے اور یہ توہین عدالت کا کیس ہے۔
ایڈووکیٹ جنرل نے استدعا کی کہ عمران خان کو شوکاز نوٹس جاری کیا جائے۔
واضح رہے کہ اسلام آباد ہائی کورٹ نے پیر کو سابق وزیراعظم عمران خان کے ایڈیشنل سیشن جج زیبا چوہدری کے خلاف بیان پر ازخود نوٹس لیتے ہوئے توہین عدالت کی سماعت کرنے کا فیصلہ کیا تھا۔
