اردو ورلڈ کینیڈا ( ویب نیوز )پاکستان تحریک انصاف کے چیئرمین عمران خان پر حملے کے خلاف راولپنڈی میں احتجاج تیسرے روز میں داخل ہو گیا۔ کارکنوں نے راولپنڈی میں کئی سڑکیں بلاک کر کے احتجاج جاری رکھا۔
مری روڈ، پیر ودھائی موڑ، گلزار قائد اولڈ ایئرپورٹ روڈ، سرائے کل چوک ٹیکسلا، رتہ شاہ چوک مارگلہ، موٹروے ایم ٹو، اسلام آباد کے قریب لاہور ٹول پلازہ مختلف مقامات پر جاری احتجاج کے باعث بند کر دیا گیا
مشتعل افراد نے سواں پل کے قریب راولپنڈی جانے والی سڑک کو بھی بند کر دیا ہے جب کہ سڑکیں بند ہونے کی وجہ سے ٹریفک کو سڑک کے ایک طرف سے روکا جا رہا ہے۔ مری میں بھی ٹریفک کا نظام آج تیسرے روز بھی بری طرح متاثر رہا۔
دوسری جانب جی ٹی روڈ سواں پل کے قریب پی ٹی آئی کے دھرنے کے باعث مال بردار گاڑیوں کی لمبی لائنیں لگ گئیں اور مسافر گاڑیوں سمیت دیگر ٹریفک پھنس کر رہ گئی ۔
