اردو ورلڈ کینیڈا ( ویب نیوز)حکمران اتحاد پی ٹی آئی ایم این ایز کے استعفوں کا فیصلہ دسمبر کے اوائل میں کریگا
حکمران اتحاد نے ایم این ایز کےایوان چھوڑنے کی ان کی درخواست کو مسترد یا قبول کرنے کے بارے میں کوئی فیصلہ نہیں کیا۔
قومی اسمبلی سیکرٹریٹ کے ذرائع کے مطابق پی ٹی آئی کے کچھ حلقوں نے حال ہی میں یہ تاثر دیا تھا کہ حکمران اتحاد نے استعفے قبول نہ کرنے کا فیصلہ کیا ہے – جو 10 اپریل کو پی ٹی آئی کے چیئرمین عمران خان کی برطرفی سے عین قبل پیش کیے گئے تھے۔
ذرائع کا کہنا ہے کہ اس طرح کا کوئی فیصلہ نہیں کیا گیا ہے کیونکہ قومی اسمبلی کے سپیکر راجہ پرویز اشرف نے پہلے ہی گیارہ اراکین اسمبلی کے استعفے منظور کر لیے ہیں۔
ذرائع نے بتایا کہ پی ٹی آئی کے 11 اراکین پر جو فارمولہ لاگو کیا گیا ہے اس کا اطلاق باقی تمام استعفوں پر بھی ہوگا۔
پی ٹی آئی سے تعلق رکھنے والے تقریباً تین درجن قومی اسمبلی کے ارکان نے ایوان میں واپسی کا ارادہ ظاہر کرنے کے لیے اسپیکر کے دفتر سے رجوع کیا ہے۔
ذرائع نے بتایا کہ قومی اسمبلی کے سپیکر کو اب سے 14 ہفتوں کے اندر فیصلہ کرنا ہوگا بصورت دیگر آئین کی پابندیوں کے مطابق اسمبلی کی بقیہ مدت میں ضمنی انتخاب ممکن نہیں ہوگا۔
ذرائع نے نشاندہی کی کہ جن ایم این ایز نے این اے سیکرٹریٹ سے رجوع کیا وہ اگلے عام انتخابات میں پی ٹی آئی کے ٹکٹ کے لیے پرامید نہیں تھے یا پارٹی کے ٹکٹ پر الیکشن لڑنے کا ارادہ نہیں رکھتے تھے۔
