اردو ورلڈ کینیڈا ( ویب نیوز)وزیراعلیٰ پنجاب چوہدری پرویز الٰہی سے امریکہ میں پاکستان کے اعزازی قونصل جنرل شاہد احمد خان نے ان کے دفتر میں ملاقات کی، جس میں باہمی دلچسپی کے امور اور سرمایہ کاری کے امکانات پر تبادلہ خیال کیا گیا۔

ملاقات میں کاروباری تعلقات کے فروغ کے لیے ضروری اقدامات اٹھانے کا فیصلہ کیا گیا۔

وزیراعلیٰ نے اس موقع پر گفتگو کرتے ہوئے کہا کہ ٹیکنالوجی کی منتقلی کے لیے امریکی ملٹی نیشنل کمپنیوں کے ساتھ مل کر ضروری اقدامات کیے جائیں گے۔ انہوں نے کہا کہ پنجاب مائیکرو چِپ ٹیکنالوجی کے آغاز سے آئی ٹی بزنس ایکسپورٹ میں برتری حاصل کرے گا۔

وزیراعلیٰ نے کہا کہ سلیکون ویلی بوسٹن کے اشتراک سے پنجاب میں آئی ٹی کے شعبے کو فروغ دیا جائے گا۔ وزیراعلیٰ نے انکشاف کیا کہ پنجاب کی آئی ٹی یونیورسٹیوں کو مزید ترقی دینے کے لیے امریکی آئی ٹی یونیورسٹیوں کے ساتھ تعاون کیا جائے گا۔ انہوں نے مزید کہا کہ آنے والے دنوں میں پاکستان اور امریکہ کے درمیان مزید خو شگوارتعلقات ہوں گے۔