اردو ورلڈ کینیڈا ( ویب نیوز )اسٹیٹ بینک کی جانب سے گوگل کو ادائیگی روکنے کے بعد یکم دسمبر سے ملک میں گوگل پلے اسٹور کی سروسز بند ہونے کا خدشہ ہے۔
رپورٹس کے مطابق اسٹیٹ بینک آف پاکستان کی جانب سے بین الاقوامی سروس فراہم کرنے والوں کو 34 ملین ڈالر کی ادائیگی منسوخ کرنے کے بعد موبائل صارفین یکم دسمبر 2022 سے پاکستان میں گوگل پلے اسٹور کی مفت سروسز ڈان لوڈ نہیں کر سکیں گے۔
گوگل پلے سٹور کی سروسز معطل ہونے کے بعد پاکستانی صارفین کو کریڈٹ کارڈ یا ڈیبٹ کارڈ کے ذریعے ادائیگی کرنا ہو گی جس کے بعد گوگل اور دیگر بین الاقوامی ایپس کو ڈا ئون لوڈ کیا جا سکے گا۔
انفارمیشن ٹیکنالوجی کے وزیر امین الحق نے وزیر خزانہ اسحاق ڈار کو خط لکھا ہے کہ وہ ریاست کے ساتھ پلے اسٹور کیریئر کی ادائیگیوں پر عائد پابندی کو فوری طور پر ہٹا دیں۔
خط میں وزیر آئی ٹی نے کہا ہے کہ ادائیگیوں کی معطلی سے ملک میں انفرادی سطح پر عوام کو نقصان پہنچے گا، وزیر خزانہ معاملے کا فوری نوٹس لیں اور معاملے کے حل کے لیے اسٹیٹ بینک سے بات کریں۔
