اردو ورلڈ کینیڈا ( ویب نیوز )وزیر اعلی پنجاب کے خلاف عدم اعتماد کا معاملہ، اسمبلی میں نمبرز گیم سامنے آ گئی، چوہدری پرویز الہی کو ایوان سے اعتماد کا ووٹ حاصل کرنے میں چیلنج درپیش ہے۔
ذرائع کے مطابق پرویز الہی کو اعتماد کے 186 ووٹ درکار ہیں اور پنجاب اسمبلی کے 371 رکنی ایوان میں تحریک انصاف کے 180 ارکان ہیں جب کہ تحریک انصاف کو مسلم لیگ ق کے 10 ارکان کی حمایت بھی حاصل ہے۔ پنجاب میں حکمران اتحاد کو 190 ارکان کی حمایت حاصل ہے۔
وزیراعلیٰ، سپیکر اور ڈپٹی سپیکر پنجاب اسمبلی کے خلاف تحریک عدم اعتماد جمع
پنجاب میں اپوزیشن اتحاد کو 180 ارکان کی حمایت بھی حاصل ہے جن میں مسلم لیگ ن کے 167 ارکان، پیپلز پارٹی کے 7 ارکان شامل ہیں جب کہ اپوزیشن اتحاد میں 5 آزاد ارکان اور راہ حق پارٹی کا ایک رکن بھی شامل ہے۔
اسمبلی ذرائع کا کہنا ہے کہ قواعد و ضوابط کے تحت ن لیگ کے 18 ارکان وزیراعلی کو اعتماد کے ووٹ میں ووٹ دے سکتے ہیں۔
دوسری جانب اسپیکر نے وزیراعلی پنجاب کے اعتماد کے ووٹ کے معاملے پر اجلاس بلانے کے حوالے سے قانونی ماہرین سے رائے طلب کرلی ہے۔
ذرائع کے مطابق گورنر کی جانب سے بلایا جانے والا اجلاس آئین کے تحت سپیکر پنجاب اسمبلی بلاتے ہیں تاہم اسمبلی سیکرٹریٹ کی جانب سے تاحال اجلاس کا نوٹیفکیشن جاری نہیں کیا گیا۔
ذرائع کا کہنا ہے کہ قانونی ماہرین سے مشاورت کے بعد اسپیکر اجلاس بلانے یا نہ بلانے کا فیصلہ کریں گے۔
