اردو ورلڈ کینیڈا ( ویب نیوز)ٹیسٹ کے آخری روز نیوزی لینڈ کے 319 رنز کے تعاقب میں پاکستان نے دوسری اننگز میں 9 وکٹوں پر 304 رنز بنائے۔ پاکستان کو جیتنے کے لیے 15 رنز اور نیوزی لینڈ کو ایک وکٹ درکار تھی لیکن امپائر نے آج کی اننگز کے 3 اوورز قبل ہی کم روشنی کے باعث میچ ختم کردیا
اس طرح 2 ٹیسٹ میچوں کی سیریز بھی بغیر کسی نتیجے کے ختم ہوگئی۔
آج آؤٹ ہونے والے پہلے پاکستانی کھلاڑی امام الحق تھے جو ایک بار پھر آگے بڑھے اور ایش سودی کے ہاتھوں بولڈ ہوگئے، انہوں نے 12 رنز کی اننگز کھیلی۔
پاکستان کی چوتھی وکٹ 77 رنز پر گری جب بابر اعظم 27 رنز بنا کر بریسویل کی گیند پر وکٹوں کے پیچھے کیچ آؤٹ ہوئے جب کہ شان مسعود بھی لمبی ہٹ کرنے کی کوشش میں کیچ آؤٹ ہوئے، انہوں نے 35 رنز کی اننگز کھیلی۔ .
سرفراز اور سعود شکیل نے کیوی بولرز کے خلاف مزاحمت کی اور 6 وکٹوں پر 132 رنز کی شراکت قائم کی تاہم سعود شکیل 32 رنز بنانے کے بعد آؤٹ ہوگئے۔
اس کے بعد سرفراز اور آغا سلمان کے درمیان 70 رنز کی شراکت قائم ہوئی تاہم آغا سلمان 30 رنز بنا کر ہینری کا شکار بنے جب کہ حسن علی بھی 5 رنز بنانے کے بعد پویلین لوٹ گئے۔
سرفراز احمد نے شاندار سنچری اسکور کی اور 118 رنز بنانے کے بعد کیچ آؤٹ ہوگئے اس کے بعد میچ دلچسپ مرحلے میں داخل ہو گیا لیکن نسیم شاہ اور ابرار نے کیویز باؤلر کا سامنا کیا۔
پاکستان کو جیت کے لیے 15 رنز اور نیوزی لینڈ کو ایک وکٹ درکار تھی، امپائر نے کم روشنی کے باعث آج کی اننگز سے 3 اوورز قبل ہی میچ ختم کر دیا اور یوں دوسرا ٹیسٹ بھی ڈرا ہو گیا اور 2 میچوں کی سیریز بھی ختم ہو گئی۔
کیویز کی جانب سے براسویل نے 4، سودھی اور ساؤتھی نے بالترتیب 2 اور 2 کھلاڑیوں کو آؤٹ کیا۔
سرفراز احمد کو شاندار بلے بازی پر میچ کا بہترین کھلاڑی قرار دیا گیا۔
واضح رہے کہ گزشتہ روز نیوزی لینڈ نے اپنی دوسری اننگز 277 رنز 5 کھلاڑی آؤٹ پر ڈیکلیئر کر دی تھی اور پاکستان کو جیت کے لیے 319 رنز کا ہدف دیا تھا۔
