اردو ورلڈ کینیڈا ( ویب نیوز ) سابق ٹیسٹ اسپنر سعید اجمل نے شاداب خان کی پی ایس ایل کے لیے دستیابی کی تصدیق کردی۔اسلام آباد یونائیٹڈ اور اسپانسر آرگنائزیشن کے ساتھ شراکت داری کے معاہدے کی تقریب میں سوالات کے جوابات دیتے ہوئے شہرہ آفاق اسپنر کا کہنا تھا کہ پاکستانی کھلاڑیوں کو انٹرنیشنل لیگز کھیلنے جانا چاہیے۔
زخم کسی بھی وقت اور کہیں بھی ہو سکتے ہیں۔ بگ بیش میں کھیلنے سے شاداب خان کو کافی فائدہ ہوا ہے۔ آسٹریلیا میں کھیلنے کی وجہ سے ورلڈ کپ میں ان کی کارکردگی کا گراف بلند ہوا ہے۔ شاداب خان جنوری کے تیسرے ہفتے میں ٹریننگ شروع کریں گے اور پی ایس ایل کے لیے بطور کپتان دستیاب ہوں گے۔
سعید اجمل نے پی سی بی میں سیاسی کردار کے خاتمے کی حمایت کرتے ہوئے کہا کہ پی سی بی میں قانون ہونا چاہیے۔ چیئرمین تبدیل ہوتا ہے تو اس کا اثر کھلاڑیوں پر پڑتا ہے۔ نئے چیئرمین کے آتے ہی کئی لوگ نوکریوں سے ہاتھ دھو بیٹھتے ہیں۔ . ایسا نہیں ہونا چاہیے، کارکردگی کے لیے مستقل مزاجی بہت ضروری ہے۔
