اردو ورلڈ کینیڈا ( ویب نیوز ) چیئرمین پی سی بی نجم سیٹھی نے پی ایس ایل کے 8ویں ایڈیشن کے شیڈول کا علان کر دیا ، چیئرمین پاکستان کرکٹ بورڈ نے لاہور میں پریس کانفرنس سے خطاب کرتے ہوئے کہاکہ پی ایس ایل 8 سے متعلق پریس کانفرنس کرکے خوشی ہوئی، گزشتہ سال پی ایس ایل کے لیے اچھا رہا، پاکستان سپر لیگ آئی پی ایل سے بڑا ٹی ٹوئنٹی برانڈ ہے۔انہوں نے کہا کہ پی ایس ایل 8 کی افتتاحی تقریب ملتان میں ہوگی ۔
یہ بھی پڑھیں
پی ایس ایل 8 کا شیڈول فائنل ،اعلان جمعہ کو متوقع
لیگ کے میچز دو مرحلوں میں ہوں گے، میچز ملتان، کراچی، راولپنڈی اور لاہور میں ہوں گے۔پی ایس ایل کے شیڈول کے مطابق دفاعی چیمپئن لاہور قلندرز اور ملتان سلطانز کے درمیان پہلا میچ 13 فروری کو ملتان میں کھیلا جائے گا۔34 میچز میں سے 11 راولپنڈی، 9 میچ کراچی اور لاہور جبکہ 5 میچ ملتان میں کھیلے جائیں گے۔
پاکستان سپر لیگ کا فائنل 19 مارچ کو لاہور کے قذافی اسٹیڈیم میں ہوگا۔انہوں نے کہا کہ پی ایس ایل کے موقع پر خواتین کے تین نمائشی میچ ہوں گے جس میں غیر ملکی کھلاڑی بھی شرکت کریں گی۔نجم سیٹھی نے کہا کہ مینجمنٹ کمیٹی کے پہلے اجلاس میں انہوں نے کہا کہ وہ کوئٹہ میں نمائشی میچ کرانا چاہتے ہیں، کوئٹہ میں میچز کے لیے وہاں کی انتظامیہ سے بھی بات کی ہے۔
