اردو ورلڈ کینیڈا ( ویب نیوز )وزیراعظم شہباز شریف نے ترکی کے صدر رجب طیب اردوان کو ٹیلی فون کیا اور زلزلے سے ہونے والی تباہی پر دلی افسوس کا اظہار کیا۔

ترکی کے صدر سے گفتگو کرتے ہوئے وزیراعظم نے کہا کہ وہ زلزلے سے قیمتی انسانی جانوں کے ضیاع پر گہرے دکھ اور غمزدہ خاندانوں سے دلی ہمدردی اور تعزیت کا اظہار کرتے ہیں۔

شہباز شریف نے کہا کہ آزمائش کی اس گھڑی میں پاکستان اپنے بھائی ترکی اور عوام کے ساتھ ہے اور زلزلے کی تباہی سے نمٹنے میں ترکی کی حکومت اور عوام کے ساتھ مکمل تعاون کرے گا۔

شہباز شریف نے کہا کہ موسمیاتی تبدیلی کی تباہی کی شدت میں اضافہ ہو رہا ہے، قدرتی آفات اور موسمیاتی آفات کسی سرحد، خطے اور مخصوص قوم تک محدود نہیں ہیں۔

وزیراعظم پاکستان نے زلزلے میں جاں بحق ہونے والوں کی مغفرت اور لواحقین کے لیے صبر جمیل کی دعا کی۔

ترک صدر رجب طیب اردوان نے فون کال اور حمایت پر وزیراعظم شہباز شریف کا شکریہ ادا کیا اور کہا کہ وہ آپ کے اور پاکستانی عوام کے جذبات کی قدر کرتے ہیں۔

یاد رہے کہ ترکی اور شام میں آج صبح آنے والے 7.8 شدت کے زلزلے کے نتیجے میں 1500 سے زائد افراد ہلاک اور ہزاروں زخمی ہوچکے ہیں۔