اردو ورلڈ کینیڈا ( ویب نیوز ) ون ڈے ورلڈ کپ کے لیے ممکنہ تاریخوں اور مقامات کو شارٹ لسٹ کر دیا گیا ہے۔ کرک انفو کی رپورٹ کے مطابق بھارت کی میزبانی میں ہونے والا آئی سی سی ون ڈے ورلڈ کپ 5 اکتوبر سے شروع ہونے کا امکان ہے جب کہ ایونٹ کا فائنل 19 نومبر کو کھیلا جائے گا۔
ون ڈے ورلڈ کے میچز کے حوالے سے رپورٹ میں دعویٰ کیا گیا ہے کہ بورڈ آف کرکٹ ان انڈیا (بی سی سی آئی) نے جن مقامات کو شارٹ لسٹ کیا ہے ان میں بنگلور، چنئی، دہلی، دھرم شالہ، گوہاٹی، حیدرآباد، کولکتہ، لکھنؤ، اندور، راجکوٹ، ممبئی اور احمد آباد شامل ہیں۔
ٹورنامنٹ میں 46 دنوں میں 48 میچ کھیلے جائیں گے جبکہ فائنل دنیا کے سب سے بڑے نریندر مودی اسٹیڈیم میں کھیلا جائے گا۔آئی سی سی ورلڈ کپ کے شیڈول کا اعلان ایک سال پہلے کر دیا جاتا ہے لیکن بھارتی کرکٹ بورڈ ابھی تک حکومتی منظوری کا انتظار کر رہا ہے جس میں دو بڑے مسائل ٹورنامنٹ کے لیے ٹیکس چھوٹ اور پاکستان کرکٹ ٹیم کے لیے ویزا کلیئرنس ہیں۔
آئی سی سی کے قوانین کے مطابق کسی بھی ایونٹ کے میزبان ملک کو حکومت سے ٹیکس چھوٹ ملنی ہوتی ہے لیکن بھارتی ٹیکس قوانین آئی سی سی کی ضرورت کے مطابق ایسی ٹیکس چھوٹ کی اجازت نہیں دیتے، اگر بی سی سی آئی ٹیکس چھوٹ حاصل کرنے میں ناکام رہتا ہے تو آئی سی سی کو نقصان ہو سکتا ہے۔
براڈکاسٹ ریونیو پر 21.84% ٹیکس کی مد میں $116 ملین، جو BCCI اور دیگر تمام ممبر ممالک برداشت کریں گے۔واضح رہے کہ بی سی سی آئی نے 2014 میں آئی سی سی کے ساتھ میزبانی کا معاہدہ کیا تھا۔
دوسری جانب بھارتی بورڈ نے ایونٹ کے لیے تمام رکن ممالک کی ٹیموں، آفیشلز، میڈیا اور شائقین کے لیے ویزوں کے یقینی اجراء سے متعلق خط تاحال جمع نہیں کرایا، جس کی یقین دہانی گزشتہ میٹنگز میں کی گئی تھی۔
