اردو ورلڈکینیڈا ( ویب نیوز)وزیر اعظم کی زیر صدارت اتحادی جماعتوں کا اجلاس ، سپریم کورٹ کے 3 رکنی بینچ کے بائیکاٹ کا فیصلہ ، نواز شریف نے بھی توثیق کر دی ۔
حکمران جماعت پاکستان ڈیموکریٹک موومنٹ (پی ڈی ایم) اور اتحادی جماعتوں نے پنجاب اور خیبرپختونخوا میں انتخابات کے التوا پر سپریم کورٹ کے 3 رکنی بینچ کے بائیکاٹ کا فیصلہ کیا ہے۔
وزیراعظم شہباز شریف کی زیر صدارت اتحادی جماعتوں کا اجلاس ہوا، جس میں سپریم کورٹ کے بینچ اور ملکی سیاسی صورتحال پر پنجاب اور خیبرپختونخوا میں انتخابات ملتوی کرنے سے متعلق غور کیا گیا۔ اجلاس کے دوران وزیر اعظم شہباز شریف نے سابق وزیر اعظم نواز شریف سے دو صوبوں میں انتخابات ملتوی کرنے سے متعلق سپریم کورٹ کے 3 رکنی بینچ کی مجوزہ سماعت کے معاملے پر حکومتی تعاون سے متعلق مشاورت کے لیے رابطہ کیا۔
نواز شریف نے تجویز دی کہ پی ڈی ایم کی تمام جماعتوں کو 3 رکنی بینچ کا بائیکاٹ کرنا چاہیے، 3 رکنی بینچ سے انصاف کی کوئی امید نہیں کیونکہ 3 رکنی بینچ میں ثاقب نثار سے وابستہ افراد شامل ہیں۔ اجلاس میں مشاورتی بحث کے دوران تجویز دی گئی کہ اٹارنی جنرل عدالت میں پیش ہوں اور 3 رکنی بینچ پر عدم اعتماد کا اظہار کریں۔
سپریم کورٹ کو آگاہ کریں گے۔ اجلاس میں پی ڈی ایم کی قیادت کی جانب سے سپریم کورٹ کے 3 رکنی بینچ کے بائیکاٹ کی تجاویز بھی آئیں جنہیں نواز شریف نے منظور کرلیا۔ نواز شریف کا کہنا تھا کہ بینچ کے بائیکاٹ کے سوا کوئی چارہ نہیں، سیاسی قیادت کی اکثریت کے مطالبے کے باوجود فل بنچ کی تشکیل نہ کرنا خصوصی ایجنڈے کی علامت ہے۔
